DAVAO CITY - Human sa kapin duha ka bulan gikan nasakmit ang minilyon nga mga bloke sa high-grade cocaine, gisunog na kini alas 3:30 sa hapon kagahapon, Lunes.

Gisunog ang druga didto sa Holcim Davao Plant compound, Barangay Ilang, Bunawan District.

Alas 2:30 sa hapon gitimbang una ang cocaine sa mga chemists sa Philippine Drugs Enforcement Agency (Pdea) 11 dayon gidauban.

Atubangan ni Davao City Mayor Rodrigo R. Duterte gipangdabdaban ang 62 ka bloke sa cocaine nga nakuha sud sa Maersk Sealand container van nga midunggo sa Sumifru wharf, Marso 22, 2014.

Gisulti ni Duterte nga nabalik ang 62 bloke gikan sa 64 nga bloke gumikan sa pakabana sa pipila ug ang iyang paghatag og ganti sa makatudlo kung asa gidala ang uban niini subay sa naunang nasakmit nga 24 ka bloke.

Sa programang 'Gikan sa Masa, Para sa Masa', gisulti ni Duterte nga dunay nahatagan og ganti sa pagtug-an kung hain gidala ang uban nga cocaine.

"Ubay-ubay ang nahatagan og reward, wa nako hinuon makuwenta," ingon sa mayor.

Gidugang sab niini nga ang duha ka ka nawalang bloke sa cocaine gidala na kini sa Surigao ug naila na ang suspek.

"Naa nami ginasunod nga mga leads kung asa mi padulong. Naay duha ka suspek, gidagan nila sa Surigao," sulti ni Duterte.

Si Pdea 11 regional director Emerson Rosales, kinsa mao ang head sa Task Force Cocaine, nanigurong human niini wa nay mosulod pa nga ilegal nga kontrabando sa druga ang mosulod sa rehiyon labi na sa dakbayan.

Nasayran human masakmit ang mga cocaine mimugna dayon ang lokal nga kagamhanan sa siyudad og Executive Order No. 17, Series of 2014, niadtong Marso 27, 2014.

Tumong sa EO mao ang pagmugna sa Task Force Cocaine nga maoy mangita sa kontrabando.

Ang matag bloke sa cocaine mokantidad og P6-milyones. (Jeepy P. Compio)