USA sa pinakadakong tunghaan, Kapitan Tomas Monteverde Sr. Central Elementary School, sa siyudad sa Davao nakasinati og dakong problema sa kakuwang sa magtutudlo atol sa pagbukas sa klase kagahapong adlawa.

Ang maong tunghaan dunay 772 kindergarten nga na-enroll sa school year 2014-2015, apan ang tunghaaan duna lamay usa ka permanenteng kindergarten teacher.

Si Merlinda Roma, school principal, nagsulti nga ang ihap sa mga nalista nga mga bata gilauman pa nga mosaka tungod kay padayon pa silang midawat og enrollees kagahapon.

Suma ni Roma nga ang tunghaan nagkinahanglan og 12 ka kindergarten teachers alang sa 772 students.

Giingon niya nga ang ratio sa magtutudlo ug kindergarten students kinahanglan nga 1:30.

Ang usa ka permanent teacher sa Kapitan Tomas mao si Mae Bernales.

Kagahapon lang, si Roma nagsulti nga si Bernales nagklase sa 60 ka mga estudyante -- 30 ka bata sa buntag ug laing 30 alang sa hapon nga klase.

Angubang mga estudyange nga wa mailawom ni Bernales walay klase, suma ni Roma.

“Karon nga week mag-wait sa mi. Ang division office mag-deploy man og kinder items pero congressional items na siya sa kinder,” suma ni Roma sa pakighinabi sa Sun.Star Davao kagahapon.

“Hopefully, permanent na ang mahatag sa amoa kay unsaon namo na og tudlo ang kinder nga 700 plus,” dugang niya.

Aron masulbad ang problema sa kakuwang sa magtutudlo sa kindergarten, si Jenielito “Dodong” Atillo, DepEd 11 spokesperson, nagsulti nga usa sa mga solusyon mao ang paggamit sa grade one nga magtutudlo.

“Wala na tay volunteer-teachers karon kay naningkamot ang departamento nga maka- provide og teacher items for kindergarten,” suma ni Atillo sa pakighinabi.

Apan, si Roma nagkanayon nga di sila maka-assign og grade one teachers nga magklase sa kindergarten sanglit duna sab silay advisory class nga 45 hangtud 60 ka estudyante.

"Mag-wait gyud sila kay ang akong grade one man gud shifting sila, unya daghan man na silag ginahimo, so mag-wait sa mi sa Deped division," sulti ni Roma.

Sa laing bahin, si Roma nagsulti nga naglaum sab sila nga dunay kakuwangon sa bangko alang sa kinder students kon magsugod na ang klase.

Gibana-bana niya nga dunay kuwang nga 300 ka bangko alang sa kindergarten.

Hangtud kagahapon, dunay kapin 4,800 ka mga enrollees sa Kapitan Tomas gikan sa kinder hangtud grade six.

Gisulti niya nga ang ihap sa mga estudyante misaka og 500 kumpara sa miaging tuig.

Giangkon sab niya nga kuwang sab ang ilang magtutudlo sa grades one hangtud grade six.

“Mao gani congested ang other classroom kay wala pay teacher so i-prorate gyud na siya sa uban nga section,” panapos niya.