BIDAHAN sa magsu­ong sila si Jason ug “Prince” Albert Pagara lakip na si AJ “Bazooka” Banal ang ika-26 nga edisyon sa Pinoy Pride boxing promotion nga gikatakda karong Hunyo 21 sa Waterfront Hotel sa Lahug, Cebu City.

Si Jason (33-2, 20KO’s) modepensa sa iyang World Boxing Organization (WBO) International light welterweight title batok kang Mexican Mario ‘Rocky’ Meraz (20-3,16KO’s).

Nagkanayon si ALA Promotions president Michael Aldeguer nga usa kini ka malisod nga tahas alang kang Jason, usa ka tahas nga magtuntol kon asa paingon ang iyang boxing career.

“Let’s wait and see,” tubag ni Aldeguer sa pangutana kagahapon sa press conference sa St. Mark Hotel kon unsa’y plano sa ALA Promotions kabahin sa boxing career ni Jason, kinsa naa sa weight category nga gitapukan og dekalidad nga mga boksidor sa tibuok kalibutan.

“This is a defining fight for Jason,” dugang ni Aldeguer.

Si Meraz usa ka lehitimong knockout artist diin siyam sa 16 nga iyang gipangtumba ang wala nakahuman sa 1st round.

Hinuon gipasabot ni Jason nga gitun-an niya’g maayo ang estilo ni Me­raz ug wala siya mahadlok bisan gamay.

Sa iyang bahin, si Prince Albert (20-0, 14KOs) makigharong kang Mexican Hugo “Olympico’ Partida (21-4-2,16KO’s) aron ilugan ang bakanteng International Boxing Federation (IBF) Intercontinental junior featherweight title.

Samtang si Banal (32-2-1, 21KOs) makigkontra kang Indonesian Defry “The Hammer” Palulu (10-0, 9KOs) sa usa ka non-title bout.