DISMAYADO ang donors sa Belgium human gilisud-lisod ang ilang hinabang sa mga nabiktima sa bagyong Yolanda.

Ang Rotary International sa Belgium nagtamputampo ug mga donasyon ug nakaabot kini ug 12 ka container vans sa relief goods. Miabot kini sa Cebu International Port (CIP.) sa miagi pang Enero.

Hangtod karon wala pa gihapon kini mahatag ngadto sa survivors gumikan kay gipug­ngan sa Bureau of Customs (BOC) sa Sugbo. Si Cebu Customs District Collector Roberto Almadin nangatarungan nga dili ang ilang ahensya ang problema apan sa mga donors.

Naunsa na hinuon ni, ang mihatag ug hinabang mao pa ang gibasol ni Almadin? Matod ni Almadin nga kinahanglan nga mobayad daan sa buluhisan ang Rotary ug kompletuhon ang mga rekesitos.

Ang Belgians nga donors nahiubos kay ang ilang tuyo mao ang paghatag og dinaliang tabang kay mibati sila sa mapait nga kahimtang sa mga Pilipino nga grabeng nahiagom sa bagyo.

Naa sa ilang hunahuna nga maabot dayon ngadto sa survivors ang ilang hinabang. Apan tungod sa red tape ug daghang mga kuskos balu­ngos sa taga BOC, posibleng nangadubok na karon ang mga donasyon sa CIP.

Midepensa si Almadin nga aron makalibre sa buluhisan ug ubang bayranan ang Rotary,

mahimong ila kining idonar ngadto sa Department of Social Welfare and Development (DSWD).

Apan nagdumili ang Rotary sa pag-agi sa ilang hinabang sa DSWD. Posible nga ang mga Belgians walay salig sa DSWD kay daghang mga hinabang nga giaagi sa DSWD ang nalangay ug hatag sa survivors ug ang uban nangalata na lang.

Didto bitaw sa Tacloban City human sa bagyong Yolanda, naisyu man to kay dugay ang paghatag sa mga hinabang kay ang putos markahan pa og DSWD ug dunay report nga nawagtang ang tatak sa nagdonar. Kanang mga 175 ka container vans sa bogas humay gikan sa nasud sa Algeria nga giagi sa DSWD niadto pang Enero, naa pa man gihapon sa CIP.

Si Almadin midugang nga gituman lang sa BOC ang balaod aron sa paglikay nga dili sila malutsan ug mga smuggled nga botang.

Kon balaod ang basehan, angayng timan-an ni Almadin nga ang espirito sa balaod ug dili lang ang letra ang iyang tan-awon. Apil sa dakong katuyuan sa balaod mao ang paghatag ug kaangayan.

Aequitas legem sequitur (Equity follows the law). Diha sa kaangayan ang balaod.

Maowaw ta sa mga langyawng nasud sama sa Belgium nga kita pay tabangan, ato pa silang lisud-lisuron ug maayo. Kon ang punto mao nga aron dili malutsan ug smuggled nga mga butang, nganong wala man ma­santa gihapon ang smuggling nga giagi sa BOC?

Nganong naay klarong smuggled nakalusot? Nganong naay klarong hinabang gitanggong?

Kinsa may alkansi kung madunot ang hinabang? kwentaha kuno og maayo.