DUGANG abagahon sa mga ginikanan sa mga tinun-an karong tingbukas sa klase sa mga unibersidad ug ubang pribadong mga tunghaan sa Sugbo human hman giuyonan sa Commission on Higher Education ang gipangayong usbaw sa bayranan sa matrikula sa 14 ka mga tunghaan sa Sugbo.
Si CHED-7 Regional Director Freddie Bernal nibutyag nga adunay pito ka mga tunghaan ang giuyonan nga mopaumento sa ilang bayranan sa tanang level.
Kini naglakip na sa Asian College of Technolocy (ACT) International Educational
Foundation, Cebu Doctors University, Cebu Institute of Technology University, St. Theresa’s College, University of San Carlos, ug University of Southern Philippines Foundation ug Bantayan Southern Institute.
Samtang ang nangayog umento alang sa freshmen ug mga bag-ong tinun-an naglakip sa University of Cebu-Banilad campus, University of Cebu-Lapu-Lapu Mandaue, University Cebu-Main, University of the Visayas-Danao, University of the Viasayas-main ug Velez College.
Aduna usay mga tunghaan nga mipaumento gawas na sa Sugbo nga nakabase sa Bohol ug Negros Oriental nga mao ang Bohol Wisdom College, Diaz College, La Consolacion College, St. Paul University Dumaguete, Foundation University, ug ang Immanuel Bible College, Holy Name University.
Hinuon gitataw ni Bernal nga ang ilang gipangayog umento di tanan maadto sa panudlanan sa tunghaan kon dilang 70 porsento niini moadto sa suweldo sa mga magtutudlo ug sa mga kawani, 30 porsento pagpalambo sa pasilidad, ug ang 10 porsento lang ang maadto sa panudlanan sa tunghaan.
Si Bernal miingon nga ang nangayog karog umento sa matrikula gamay ra kaayo nga porsento sa gidaghanon sa mga unibersidad dinhi sa Central Visayas.