DUHA ka adlaw una ang pagsugod sa klase niadtong Lunes, ang Department of Education nagpagarpa nga andam na ang tanan alang sa pagbukas sa klase.

Apan taliwala sa pasalig sa ahensiya, nasayran nga daghan pang mga kanhi problema sa tulunghaan ang wala pa matubag hangtud ning panahona.

Bisan tuod kon nagmalampuson ang unang adlaw sa klase, di gihapon ikalimod nga milutaw gihapon nga mga karaang problema nga nasinati sa mga tulunghaan. Nga nagpasabot nga hangtud karon wala pa gyud masulbad sa ahensiya.

Dinhi lang sa Davao Region, giangkon sa DepEd 11 nga nagkuwang sa kinatibuk-an og 3,832 ka mga titser, samtang duna say kakuwangon sa mga klasrom nga miabot og 4,743 itandi sa milabay nga school year nga 4,315.

Base sa data nga gipagawas sa ahensiya, duna silay projected shortage sa magtutudlo nga mitaas og 604 itandi niadtong milabay nga school year nga 3,228.

Samtang sa klasrom, ang projected shortage miabot og 4,743, nga dunay pagtaas og 428 itandi sa milabay nga school year nga 4,315.

Kon atong pangutan-on ang mga opisyal sa DepEd, moingon dayon sila nga nahatagan na nila og solusyon ang kakuwangon sa mga magtutudlo ug mga eskuwelahan.

Apan kon atong tan-awon ang reyalidad, moabot gihapon og 60 ka mga bata ang matag klasrom, mas daghan sa haum nga gidaghanon nga 35, tungod kay kuwang ang maestra ug kuwang ang lawak-saringan.

Kini nagpakita lang nga di gyud mahimong tuison ang kamatuoran nga daghan pang mga problema sa edukasyon ang wala pa mahatagi og dakong pagtagad sa gobyerno.