MISUGYOT ang Land Transportation Franchi­sing and Regulatory Board (LTFRB) sa Central Visayas sa kagamhanan sa siyudad sa Sugbo nga mohimo og rerouting sa tanang mga biyahe sa mga public utility jeepney aron dili hingpit mawagtangan og panginabuhian ang mga drayber ug operator sa higayon ipatuman na ang bus rapid transit.

Si LTFRB 7 Director Ahmed Cuizon niingon nga mao kini ang usa sa mga concern ni Presidente Benigno Aquino III sa wala pa aprobahi ang BRT niadtong Mayo 29 nga kinahanglan dili mawagtangan og trabaho ang mga PUJ driver ug operators.

“LTFRB would see to it that there would be no massive dislocation of jeep­ney drivers and operators,” pasalig sa director atol sa 888 News Forum sa Marco Polo Plaza

kagahapon.

Ang P10.6 bilyones nga BRT project gipaka­sama ni Cuizon sa usa ka bukog sa isda diin ang mga BRT bus anha motadlas sa dagko nga mga bukog samtang ang mga PUJ anha motadlas sa gagmay nga mga bukog sa isig ka kilid nga maoy tigkuha ug tighatod sa mga pasahero nga gikan misakay o paingon mosakay sa BRT bus.

Ang BRT moukopar sa duha ka inner lanes sa karsada gikan sa Bulacao paingon sa Talamban agi sa Jones Avenue, dan Escario, paingon sa Cebu Business Park ug Archbishop Reyes Avenue.

Si Cuizon namahayag nga kon dunay ma-dislocate nga mga PUJ drayber mao kini ang iprayoridad nga mahatagan og trabaho sa BRT system.

Atol sa survey sa mga consultant sa World Bank nga maoy nipahigayon og feasibility study sa proyekto, matod ni Cuizon, kadaghanan sa mga drayber niuyon nga ma-dislocate sila apan kinahanglan mahatagan sila o ang ilang asawa o miyembro sa ilang pamilya og trabaho sa pagpatuman sa BRT system.

Siya nidugang sila mahimo tighatag og tiket, mahimong trabahante sa BRT system, o mahimo sila makapaninda sa 14 ka mga bus station.

Si Cuizon niingon nga ang mga PUJ nga dili na makabiyahe mahimo hatagan og prangkisa sa LTFRB alang sa truck for hire diin mahimo putlan og bukobuko ang ilang jeepney aron mahimong open truck alang sa pak­yaw o delivery.

“So dili sila kinahanglan nga tangtangan nato og panginabuhi rather we would want to see nga we will all co-exist together economically and in feasibly manner. Maka-share pud sila og blessings niining bus rapid transit system sa dakbayan sa Sugbo,” dugang pagpasabot sa director.

Siya nalipay nga naa­probahan na sa nasodnong kagamhanan ang BRT system ug siya nanghi­naut nga mapaspasan ang pag-implementar niini.

Iyang gihulagway ang BRT nga mas epektibo nga pamaagi sa transportasyon alang sa masa nga mas maayo, masayon, kasaligan ug paspas kon itandi sa mga PUJ.