DAVAO DEL SUR - Gipailawom sa random drug test ang mga sakop sa Davao del Sur Provincial Police Office (DSPPO) aron masegurong way nagagamit og ginadiling druga kanila.
Nasurprisa ang kapulisan human kalit nga miabot ang mga personahe sa PNP crime laboratory, ala 1:00 sa hapon, Lunes.
Matud ni Senior Supt. Michael John Dubria, provincial police director, 31 ka mga sakop sa DSPPO ang gipailawom sa drug test nga gipangulohan ni Senior Inspector Sheryll Raotraot.
Nasayran nga ang drug testing giabagan sa mga sakop sa Provincial Anti-illegal Drugs Special Task Force (PAIDSOTF) ug Provincial Intel Unit nga milungtad og kapin duha ka oras.
Hinuon, suma ni Dubria nga gihimo nila kini aron mahimong ehemplo ang kapulisan ug maseguro nga way bisan usa kanila nga naggamitan og ginadiling druga.
Gidason sa opisyal nga kabahin sa programa sa kapulisan ang implementasyon sa drug test alang sa tinguhang "Drug Free" ang probinsiya.
Karong mosunod nga mga adlaw, himuon sab ang susamang kalihukan sa tanang istasyon ug yunit sa kapulisan. (Orlando B. Dinoy)