DUNAY silot sa mga batan-on nga masapon sa curfew nga gipatuman sugod niadtong petsa 1 sa Hunyo ning siyudad sa Cagayan de Oro.
Apan padayon pa kining gitun-an sa konseho kung unsa ang ilang ipahamtang niini. Kini ang gibutyag ni Konsehal Ramon Tabor, chairman sa police, fire and public safety sa konseho.
Hinuon sa pagpatuman niini, wala pay natalang nasapon sa curfew.
Matud ni Tabor nga kinahanglan maedukar ang mga ginikanan nga dili pasagdan ang ilang mga anak nga maglatagaw diha sa kadalanan panahon sa kagabhion.
Buot usab niini nga maleksyon ang mga batan-on nga delikado kanila ang maglakaw-lakaw sa kadanan labina nga kung masikop ang mga batan-on atimanon lamang kini og pakan-on.
Kahinumduman nga daghan sa mga barangay kapitan ang suportado ang curfew tungod kay sagad ang mga batan-on maoy gagamiton sa paghimo sa krimen tungod kay protektado man sila sa balaod.
Gawas niini, daw maoy sagad sa suspek sa pagpangout, pagpangawat ug pagpanglungkab atol sa kagabhion.
Ang curfew magsugod sa alas 10:00 sa gabii hangtod sa alas 5:00 sa kaadlawon diin gidili ang mga batan-on sa mga publikong lugar sama sa parke, bilyaran, internetan, bars ug mga disco houses.
Gilauman nga sa pagpatuman niini maleksyon ug moubos ang mga batan-on nga galatagaw atol sa kagabhion labina nga apil ang mga barangay police ang gitugotan sa pagsikop kanila. (SVB)