MAIHAP ra sa mga tudlo ang positibo sa gidi­ling drugas atol sa gipahigayon nga random drug test ngadto sa mga empleyado sa Cebu City Government sa buwan sa Mayo.

Si Dr. Alice Utlang, executive director sa Cosap, nagkanayon nga upat ka mga kawani sa City Government ang nasutang ‘drug user’ gikan sa dul-an 200 ka mga empleyado nga

gidestino sa nagkalainlaing departamento ug opisina sa City Hall.

Gihulagway ni Utlang nga nisaler ang ilang information dissemination ngadto sa mga trabahante sa siyudad diin ang ‘shabu’ way ikadalit nga kaayohan sa panglawas.

“For us sa Cosap, ni-effect ang among lecture kay gamay rang na positive sa almost 200 na gi-random drug test sa City Hall employees,” matod sa text message ni Utlang.

Sayo ning tuiga, ang Cosap nipahigayon og random drug test sa mga kawani sa City Abattoir diin adunay duha ka trabahante ang positibo.

Samtang, nagpadayon ang pagkadiskubre sa mga kawani sa barangay kinsa nasutang tiggamitan og ilegal nga drugas subay sa nagpadayon nga surprise drug test sa Cosap.

Kagahapon, laing duha gikan sa 58 ka mga kawani sa Barangay Pahina San Nicolas ang positibo sa drug test.

Ang duha giila sa Cosap nga drayber ug garbage loader sa barangay diin lakip sa nipaubos sa drug test ang mga barangay official.

Sa kinatibuk-an, niabot na og 108 ka mga kawani sa barangay ang positibo sa gidiling drugas gikan sa kapin 2,000 ka mga empleyado sa 36 ka mga barangay ang tiggamitan og ‘shabu’.

Sa 36 ka barangay, walo kanila ang gideklarar sa Cosap nga “drug free” work place sanglit way emple­yado nga positibo.

Si Utlang nagkanayon nga magpadayon ang ilang random drug test sa City Hall ug surprise drug test ngadto sa barangay employees hangtod nga mahawanan gikan sa mga ‘drug addict’ ang duha ka local government unit.