KAGAMHANAN sa dak­bayan sa Talisay nikuha sa serbisyo sa Black Pearl Security Agency nga way bidding nga gipahigayon.

Giingon nga ang 91 ka mga security guard niini gihimong job order employee sa City Halll.

Ang Commission on Audit (COA), sa ilang audit report, nihulagway nga naalkanse ang Siyudad ug dunay iregularidad tungod sa wa pagsunod sa proseso.

Si Talisay City Admi­nistrator John Yre de los Reyes, kinsa chairman usab sa Bids and Awards Committee (BAC) nga kuhaan unta sa iyang habig, wa motubag.

Nasuta usab sa COA nga atol sa pagkuha sa serbisyo sa security agency, wa pa kiniy license to operate hinungdan nga gipatubag ang mga sakop sa BAC.

Sigun sa report sa COA sa nga sa 2013, ang Talisay City Hall misulod og kontrata tali sa Lancer Security Agency gikan sa Enero hangtod na sa Hunyo 30, 2013.

Sa pagsulod sa adminstrasyon ni Mayor Johnny delos Reyes, ilang gi-extend og usa ka buwan ang kontrata sa Lancer Security Agency.

Apan sa Agusto ngadto sa Disyembre,  ilang gikuha ang serbisyo sa Black Pearl Security Agency bisan kon wa pay gi­pirmahan nga kontrata.

Matod sa COA nga kini kalapasan sa provision 16 sa Republic Act 5487 nga naglatid nga way serbisyo sa usa ka security agency nga moserbisyo kon wa pay kontrata nga gipirmahan.

Nasuta nga ang Siyudad nigasto og dul-an sa P5.1 milyones nga su­holan sa mga guwardiya.

Apan gikuha ang serbisyo sa maong security agency nga gihulagway sa COA nga shopping mode of procurement, inay hi­muon ang bidding.

Sa ilang nakuha nga mga dukomento, nasuta nga nag-operate ang maong agency sa Sugbo sukad pa niadtong 2011, apan sa ilang dukomento nga giduso nahibaw-an nga niadto lang Nobyembre 25, 2013 sila nakakuhag license to operate samtang ang pagkuha sa Talisay sa ilang serbisyo niadtong Agusto 2013.

Hinungdan nga gimandoan sa COA ang BAC sa pagpasabot nganong napakyas sila sa pagsuta sa lisensya sa security agency sa wala pa nila gikuha ang serbisyo.

Ang BAC gimandoan sa pagsunod kon unsay anaa sa balaod, sanglit kon nisunod sila sa proseso, ilang mabantayan unta nga wa pay lisensya ang agency sa pag-operate sa dihang ilang gikuha ang serbisyo.

Nasuta usab nga inay mokuha ang kagamhanan sa dakbayan sa Talisay sa serbisyo diretso sa security agency,  ang 91 ka mga guwardiya gihimo na hinuon nga job order employee nga dakong bintaha sa agency, apan dako nga kadaot sa interest sa goberno.

Ang 91 ka mga security guard nagdawat og suweldo nga P430 matag adlaw gikan sa Agusto ngadto sa Disyembre 2013.

Matod sa COA nga da­ko kining kalapasan tu­ngod kay ang mga job order employee nga anaa nadistino sa nagkadaiyang departamento sa Ta­lisay city hall nagdawatan ra og P300 matag adlaw.

Laing kalapasan mao ang pagkobra sa ilang suweldo sa city treasurer nga giihimo sa ilang representative sa agency.