GIPASAKAAN og mga kaso ngadto sa Provincial Pro­secutor’s Office ang usa ka pulis ug usa ka sakop sa Barangay Intelligence Network sa Balamban human masuta sa National Bureau of Investigation nga sila ang responsable sa pagpangrakrak sa usa ka boletsehan sayo ning tuiga.

Sila si PO3 Jose Baldicasa, nadestino sa Balamban Police Station, ug si Dennis Mancia, sakop sa BIN, nigawas sa imbestigasyon sa NBI nga maoy nangrakrak sa boletsehan sa Brgy. Nangka niadtong Pebrero 7, 2014.

Si Baldicasa nanghimakak sa pasangil ug nipasangil sa saksi nga dunay kasuko kaniya kay ilang gikiha.

Duha ang nangamatay ug duha ang naangol hinungdan nga ang mga suspek gipasakaan og mga kasong multiple murder ug multiple frustrated murder.

Atol sa pagpamusil, nangamatay ang mga nag-standby sa boletsehan nga sila si Rey Toong ug Ernel Bucag.

Naangol ang ilang kauban nga si Rhembran Estan ug ig-agaw nga si Clint Estan.

Si Mayor Ace Binghay sa Balamban maoy nihangyo sa NBI-7 sa pag-imbestigar sa hitabo.

Sa imbestigasyon sa NBI-7, nigawas nga human sa raid nga gihimo sa mga sakop sa Balamban police sa usa ka boletsehan sa Brgy. Nangka mga alas 9:45 sa gabii niadtong Pebrero 7, dunay duha ka mga tawo nga nagsakay og motorsiklo nga nisunod usab og susi

sa maong dapit mga alas 11 sa gabii.