GIPATUMAN sugod niadtong Hunyo 1 ang Republic Act 10586, ang gitawag nga Anti-Drunk and Drugged Driving Act, nga nagpahamtang sa silot nga multa gikan sa P20,000 ngadto sa P500,000 ug pagkapriso gikan sa tulo ka buwan ngadto sa 20 ka tuig niadtong magdrayb og sakyanan nga hubog sa ilimnong makahubog o sabog sa illegal nga drugas.

Mahinungdanon ang pagpatuman sa maong balaod tungod sa nagkadaghang kaso sa mga

aksidente gumikan sa pagmaneho sa sakyanan samtang ubos sa impluwensiya sa alcohol ug sa illegal nga mga drugas. Tumong niini ang kaluwasan sa mga motorista ug mga pedestrians nga maglakaw lang sa mga aseras ug motabok sa mga karsada.

Apan nipahimangno si Senate President Franklin Drilon niadtong mga tinugyanan sa balaod nga mogamit niini aron sa pag-harass ug pagpanguwarta sa mga motorista.

Giawhag niya ang Philippine National Police (PNP) ug ang Department of Transportation and Communications (DOTC) sa pagseguro nga di kini gamiton sa extortion sa mga deputized law enforcement officers (LEOs) nga paga-isyuhan og mga breath analyzers alang niini.

Ubos sa Implementing Rules and Regulations (IRR) sa maong balaod, ang usa ka deputized LEO di basta-basta makapahunong sa usa ka sakyanan ug pagbutang sa drayber ubos sa sobriety test kon way resona­ble nga basihanan nga siya makatuo nga hubog ang drayber o sabog sa illegal nga drugas, sama pananglit kon nakahimo siya og kalapasan sa balaod sa trapiko.

Adunay tulo ka mga field sobriety tests ubos sa balaod. Mao kining mosunod:

- Ang “Eye Test” o “horizontal gaze nystagmus.” Niining maong pagsuway, pasundon ang drayber sa pagtan-aw sa usa ka butang nga palihukon horizontally sa tinugyanan sa balaod usa ka tiil ang distansya gikan sa nawong sa drayber;

- Ang “Walk-and-Turn Test.” Niining maong pagsuway, palakton ang drayber og siyam ka mga lakang ug pabalikon sa samang distansya; ug

- Ang “One-Leg Stand.” Ang drayber pabarugon ginamit ang usa lang ka tiil sulod sa 60 segundos samtang ipasaka ang usa ka tiil og unom ka pulgada gikan sa yuta.

Kon mopasar ang drayber sa maong mga tests, dakpon siya sa iyang traffic violation apan di sa paglapas sa RA 10586. Kon mahagbong sa maong mga tests, mag-agi siya sa Alcohol Breath Analyzer (ABA) o “breathalyzer” Test nga modeterminar sa iyang blood alcohol level pinaagi lang sa iyang ginihawa.

Ubos sa balaod, ang limit sa blood alcohol level ubos sa 0.05 porsento alang sa kadaghanang mga drayber. Kon mosobra sa limit, dakpon and drayber ug i-impound ang sakyanan. Apan ang mga drayber sa mga sakyanang depasaheroan di tugotan sa bisan unsa ka gamay nga alcohol sa ilang dugo tungod sa mga kinabuhi nga gitugyan sa ilang mga kamot.

Ang silot naglakip sa 12 ka buwan nga pagsuspenso sa usa ka non-professional driver’s license sa unang kalapasan ug perpetual revocation sa ikaduha ug perpetual revocation sa unang kalapasan sa usa ka professional driver’s license.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan DYSS Superadyo sa RGMA network.)