NIADTONG Martes sa gabii sa dihang nagka-uban kami sa atong kaubang maglilindog sa Sun.Star Cebu ug Superbalita, Atty. Eddie Barrita uban sa mabugbaw nga botelya sa beer, mitaho siya nga namatay daw ang atong amigo nga si retired PNP chief superintendent ug Atty. Fritz Quiñanola kay gi-ataki sa kasing-kasing. Nakuha pod ni Atty. Barrita and maong impormasyon didto sa St. Peter Funeral Homes diin gikan siya nagbilar sa ilang kauban sa Toastmasters Club nga si Ed Godinez. Pero matod pa ni Atty. Barrita nga wala pay confirmation ang maong taho.

Wala dayon usab ako makatawag kang Atty. Fritz. Akong natawgan ang ato gihapong kaubang maglilindog nga si Ginoong Manny delos Santos Rabacal. Si Mr. Rabacal ug Atty. Fritz kanunay’ng magkauban kay gitawag man kana sila og White Gold boys. Ilang gihimong hang-out mao ang coffeshop diha sa White Gold. Mo-apil-apil pod ko usahay sa ilang grupo. Dili tinuod ang maong taho sa kamatayon ni Atty Fritz, matod pa ni Mr. Rabacal. Wala na ko modugang pa pagpakisusi sa maong balita.

TEXT MESSAGES

Apan kagahapon sa buntag, samtang nagpa-abot ako nga mobalik sa akong programa sa DYSS Super Radyo human sa hook up sa among Manila station, nahipugwat na lang ko sa text nessage nga akong nadawat gikan kang Sano Frank Japson nga nagkanayon: Atty Fritz Quinanola died last night. His remains now at Cosmopolitan’. Si Frank mao nay bana ni City Councilor Leah Japson. Mao nga tawgon na siya og Sano kay Bol-anon man na siya.

Laing text ako usab nga nadawat.

Akong gibawsan si Sano Frank nga dili na tinuod. Apan wala gihapon ko makontento, ako gyud nga gitawgan si Atty. Fritz ug akong nakompirmar nga dakong buhi. Nagkatawa pa.

Mitawag nako si Sano Frank ug nagkanayon nga gi-forward lang usab ngadto niya ang maong mensahe gikan sa usa ka retired Col. Mandin. Unya taud-taud mi-text usab nako si Col. Mandin nga nadawat lang pod niya ang maong text message gikan sa iyang kaila. Gi-forward usab ni Sano Frank ang maong mensahe sa iyang mga higala ug posible sab nga ang maong mga tawo mi-forward sa maong mensahe sa ilang mga higala nga higala usab ni Atty. Fritz.

RESPONSIBILIDAD

Gumikan niana, nikatap na ang balita nga namatay si Atty. Fritz. Maayo gani kay wala dayon nako ma-broadcast sa radyo kay naka ila man ta sa nagpadala. Diha na mosulod ang atong responsibilidad sa atong pagpadala anang mga text messages. Sa dili pa nato i-forward sa uban mas maayo siguro nga atong i-double check kay basin og nasayop. O ba kaha gibinoangan lang ta.

Sama god anang padad-an ta og mga messages kabahin sa kalamidad. Sama nga adunay kusog nga linog nga moigo. Ayaw na lang na ninyo i-forward sa uban aron dili sila ma-alarma. Be responsible.

(bobby.nalzaro@yahoo.com)