USA ka controlled delivery operation ang gihimo sa mga tinugyanan sa Philippine Drug Enforcement Agency (PDEA)-Northern Mindanao niadtong Martes mga alas 10:00 sa buntag sa Gaisano Mall, siyudad sa Iligan.
Ang operasyon gipangulohan ni Lanao del Norte Provincial Special Enforcement Team leader IO4 Benjamin C. Recites III.
Si PDEA-Northern Mindanao Director Emerson Margate miila sa mga suspetsado nga mao si Anisah D. Abdullah, 42, taga Orchids Homes, Santiago St., Iligan City, ug nagtrabaho isip treasurer sa Barangay Batuan, Balabagan, probinsya sa Lanao Del Sur, ug bana niining si Taha M. Abdullah, 43, minyo, kasamtangan nga kagawad sa naasoy’ng barangay.
Nakumpiska gikan sa ilang posisyon ang mokabat duha ka kilo sa gitouhang shabu nga gisulod sa duha ka transparent cellophane nga gisulod sa Mass Speaker Box nga gisulod sa LBC package.
Kini adunay kantidad nga P14 milyon. Ang mga nakumpiska nga mga illegal nga druga ang giabrihan sa presesnya sa mga Elected Officials, DOJ representative.
Nakuha usab sa ilang posisyon ang duha ka mga gagmayng sachet nga nakita sulod Mitsubishi Montero Sport Vehicle nga nagdala og plakang KGL736.
Ang nakuha adunay gibug-aton nga 10 gramo nga mobalor usab og P80 mil. Ang mga narekober nga ebidensya ang gidala na sa PDEA Laboratory Service alang sa masusing eksamin.
Samtang kasong supak sa RA 9165 ang gipasaka batok sa suspek.
Gibutyag ni Margate nga usa kini sa dakong accomplishment nga nahimo nila tungod kay kung nadistribute kini posibleng daghan gyod ang mabiktima niini.
Sa pagkakaron, nagtingkagol na sa prisuhan sa PDEA ang magtiayon.