HUBO ang lawas sa usa ka maestro dihang nasapon sa usa ka entrapment operation sulod sa usa ka inn human giingong misuway og lugos sa kanhi tinun-an sa Misamis Oriental General Comphrehensive High School (MOGCHS) ning siyudad sa Cagayan de Oro bugti sa gipangayo nga Form-137.
Nasapon sa mga tinugyanan sa National Bureau of Investigation (NBI)-Northern Mindanao sulod sa Cubicle Inn nga nahimutang sa Barangay Consolacion ning siyudad si Edgar Magallanes, 53, minyo, nagtrabaho isip Administrative Office 1V sa naasoyng’ tunghaan.
Si NBI agent Wency Galindez nibutyag nga mitaho sa ilang buhatan ang usa ka babaye nga itago na lamang sa ngalan nga Ellen, hingkod ang edad, nagtrabaho sa usa ka kompanya denhi sa siyudad ug kanhi migradwar sa highschool sa naasoyng’ tunghaan.
Matud ni Galindez nga gisaysay ni Ellen kanila nga miadto kini niadtong Huwebes sa tunghaan kay kuhaon unta niini ang form 137 nga maoy kulang sa iyang pagkuha og passport diin si Magallanes ang iyang naatubang niadtong tungora.
Apan miingon si Magallanes nga daw dili na niini makuha ang form tungod kay nakuha na kini kaniadto.
Apan giingon niining “pwede nato sindikatuhon” ug ipalusot dungan sa pag-ingon nga “unsa man imong ika-offer sa ako?”
Tungod niini mitubag si Ellen nga “Dawbi sir magbayad nalang ko?” apan miingon kini nga dili niini gusto magastuhan kini ug mitanyag og date sa usa ka pribado nga lugar.
Gani miingon pa si Ellen nga dili niya kini gusto mahitabo hinungdan milakaw niadtong tungora.
Apan nakurat si Ellen dihang daw adunay nangita kaniya sa iyang trabahoan ug maoy iyang nakita si Magallanes.
Daw gibalik na usab niini ang tanyag kaniyang makig-date bugti sa form 137.
Apan taliwala sa kahadlok ni Ellen, nangayo kini og tabang sa NBI ug gipasaligan sa mga agent nga dili pasagdan masapon lamang ang dili maayong binuhatan niini.
Niadtong Biyernes, daw nagpasumangil si Ellen nga mosugot sa pakig-date niini sa usa ka inn sa naasoy’ng dapit tungod kay nasayod kining dili kini pasagdan sa NBI.
Matud ni Galindez nga gihulat lang nila ang pila ka minuto dihang nakasulod na ang duha sa inn usa nila giabrihan ang lawak ug maoy ilang nasapon sa akto nga giingong hubo ang suspetsado.
Nakuha usab gikan sa posisyon niini ang giingong condom, ug vitamins nga inintsik.
Daw butyag usab ni Ellen nga iya kining gihimo tungod sa kabalaka nga basin daghan pa unya biktimahon niini.
Gani ang suspetsado dili gapahinabi ug nangita usab sa iyang kaugalingon nga abugado.
Kasong attempted rape, grave coercion, intimidation ang pipila sa kaso nga ilang gipasaka batok sa suspek niadtong Lunes.
Matud ni Galindez nga bantog kay nanginahanglan kaayo ang babaye iya kining gisakyan sa panahon nga dili man maayo.
Nanawagan kini niadtong mga babaye nga daw basin nabiktima niini nga motaho sa ilang buhatan.
Ang suspetsado detinadto ning panahona sa prisuhan sa NBI.
Gisuwayan usab og tawag sa Sun.Star SuperBalita kung unsay reaksyon sa principal sa naasoy’ng tunghaan apan dili kini makontak.