DEAR Noy Tikyo,
Ako si Harley, 29, nia nagtrabaho sa Davao apan lumad nga taga Trento, Agusan del Sur. Lima na ko katuig dinhi. Naa koy tulo ka anak nga nahabilin sa amoa. Di mi kasado sa ilang amahan.
Gawas nga lisud ang among kahimtang didto, iresponsable sab ang ilang amahan. Mao nga nanimpalad ko diri sa Davao bisan layo sa akong mga anak. Akong gibatukan ang kamingaw aron nga mabuhi ko sila.
Naguol ko sa dihang usa ka adlaw, ako na lang nasayran nga miuban og laing babaye ang akong kapuyo. Hinuon, ako na lang sab siyang gipasagdan.
Sa akong pag-estar dinhi, nakakita sab ko og laing lalaki nga akong gikarelasyon. Usa na mi ka tuig niya. Ganahan ko sa lalaki kay caring kaayo nako. Ang nakalisud lang kay grabe siya manelos. Bisan kinsa lang nga iyang makita nga makig-istorya nako nga lalaki, iyang selusan. Bisan text o tawag sa selpon, lainon na niya og sabot kon di nako pahibaw-on. Sa makadaghang higayon, kini maoy among awayan kay magselos lagi.
Angay ba siyang himuong kapikas sa kinabuhi? Mausab ba kaha ang iyang kinaiya kon maminyo na mi? Madawat ba kaha niya nga duna koy mga anak kay wa pa man siya mahibawo niini?
HARLEY
*****
Harley,
Angay ka nang maleksiyon sa miagi mong relasyon ug di na magdali-dali sa pagdesisyon. Kon duna ka may pagduha-duha niining imong gikarelasyon karon, mas maayo nga di ka dayon modesider nga makigminyo niya. Timbang-timbanga og maayo mintras nga wala ka pa makahinayak kay lisud na kon di mo compatible sa usag-usa. Basin og magbasol ka lang sab hinuon.
Ang selos baya basta wala na sa lugar, grabe og linugdangan. Kanang away ninyo karon, basin mas grabe pa unya kon mag-ipon na mo. Grabe na gani siya nga moselos karon nga uyab pa, unsa na kaha kon minyo na mo?
Kon unsa ang imong nakita niya karon, mao na gyud ni siya. Kon seluso siya karon, segurado nga seluso sab siya unya kon magminyo na mo. Unless kon siya mismo gustong bag-uhon ang iyang kinaiya.
Mao na nga ayaw pagdali-dali ilabi na gyud nga duna ka pay pagduda sa iyang pagkatawo.
Bahin kon dawaton ba niya ang imong mga anak, aw, depende lang gyud ni ngadto niya. Busa mas nindot nga karon pa lang daan hinay-hinayan mo na siya og sulti bahin sa imong mga anak. Pinaagi niini, imong masayran kon unsa ang iyang reaksiyon.
Tan-awon nato kon di ba mausab ang iyang pagbati nimo kon iyang masayran ang kamatuoran sa imong kinabuhi. Kay kon tinuod siyang nahigugma nimo, segurado kong di ka niya biyaan ug dawaton niya ang imong mga anak.
NOY TIKYO