HAGONOY, Davao del Sur - Human namingaw og kadali, pagpangawat og mga motorsiklo sa lungsod subli na sab nga misiaw.
Ang biktima nga mao si John Salgado Conchas, 19, way nahimo gawas sa pagdangop sa kuwerpo sa kapulisan sa dihang nasayran niya nga nahanaw na ang motorsiklo samtang giparada duol sa Guihing Gym, alas 3:00 sa kaadlawon, Martes.
Gibutyag ni Conchas nga nahanaw ang iyang kolor itom nga Honda XRM 125, nagbaton sa plakang LC 6702 nga girehistro sa ngan sa iyang lola nga si Berlinita Conchas.
Nanaghap ang kapulisan nga gikarnap ang motorsiklo human nga wa na kini igkita sa lugar.
Gialarma na sa kapulisan ang mga silingang istasyon sa kapulisan aron nga mabawi nila ang motorsiklo.
Kahibalong sagad sa mahanaw nga motor sa Davao del Sur, dalhon kini sa mga silingang mga lugar sa South ug North Cotabato sanglit atua didto ang mga mamalitay og mga piyesa ug mga giretasong bahin sa motorsiklo. (Orlando B. Dinoy)