TULUNAN, North Cotabato - Patay na nga nakit-an sa mga pulis ang usa ka priso sulod sa ilang tangkalan alas 5:00 niadtong Martes human maghikog.
Giila ang priso nga si Rodrigo Tanalion, 46, minyo, mag-uuma ug molupyo sa Barangay Sibsib.
Gibutyag ni Tulunan Chief of Police, Senior Inspector Ronie Cordero, nga ila na lang nasiplatan si Tanalion nga nagbitay na sa window grill sa prisohan gamit ang iyang jacket nga gihikot sa liog niini.
Nasayran nga una naghikog si Tanalion, namatikdan siya sa mga pulis nga mora'g lahi ang panglihok ug sige'g hinuktok.
Nakulong ang mag-uuma niadtong Mayo 28, 2014 gumikan sa kasong paglapas sa Republic Act 9262 o Violation Against Women and Children.
Mismo ang asawa ni Tanalion ang mipasaka og reklamo kaniya ngadto sa kapulisan gumikan sa grabeng pagpangulata ug pagsulay kaniya og tigbas.
Nakit-an sab sa mga otoridad ang suicide note ni Tanalion nga nagkanayon nga dili na niya makaya ang iyang problema ug nangayo siya og pasaylo sa iyang nahimo ngadto sa pamilya ilabi na sa iyang asawa.
Gipa-imbestigahan na ni North Cotabato Provincial Police Office Director Danilo Peralta ang paghikog sa priso aron maseguro nga walay foul play sa kamatayon niini. (Edgar Fuerzas)