NAGPABILING misteryoso kining atong dagan sa oras. Kung atong tagaan og atensyon, labi na nga gihulatan gayud nato ang takna sa panahon, makasulti kita nga hastang kadugay sa oras. Apan kung wala nato kini gitagad, makasulti sab kita nga paspas ang dagan sa mga panghitabo.

Sama na lang ani’ng mag usa ka tuig na diay ang milabay nga misugod sa katungdanan ang administrasyon ni Yevgeny “Bambi” Emano isip Gobernador sa probinsya sa Misamis Oriental ug Oscar “Oca” Moreno sa dakbayan sa Cagayan de Oro. Sulod sa usa ka tuig, kumusta kaha ang duruha sa pagsebisyo sa katawhan?

Sa usa ka tuig lamang nasinati nila ang managlahi’ng isyu labi na nga sa pagsugod sa ilang termino tagsa sila naka diskubre sa mga alegasyong kakulangon sa pondo sa city hall ug kapitolyo, ug ang pagdiskubre sa matud pa nga mga cash advances ug wala ma liquidate nga mga budget sa duha ka lokal nga panggamhanan, niadtong Gobernador pa si Oca ug Mayor pa ang amahan ni Bambi nga si Vicente “Dongkoy” Emano.

Sulod sa usa ka tuig pud nasinati nila Bambi ug Oca ang ka sadista sa dagan sa kinaiyahan sama sa mga pag-ulan ug bagyo sama kang Agaton nga gibahaan ang dakbayan sa Cagayan de Oro ug gigubaan og tulay ang usa ka lungsod sa Misamis Oriental.

Dili lang kana, sa ilang termino gisukod ang ilang integridad human gilabayan og bomba ang Cagayan de Oro ug tungod niini namatyan ang Misamis Oriental ug usa niya ka miyembro sa Sangguniang Panlalawigan kon Board Member.

Si Oca nagpadayon ang pagsaway batok kaniya gikan sa iyang pagtanggal sa mga manindahay sa Divisoria ug istriktong pag implementar pinaagi sa Task Force Hapsay Dalan ngadto sa kapin P4 milyones nga sakyanan gamit ang sapi sa buhis isip pagpalit niini, ug ubay-ubay nga daghan pa hinungdan nga sa usa ka tuig pa lamang gibuhatan na sya og petisyon nga palagputon siya pinaagi sa usa ka recall election nga gipangunahan sa mga kontra-partido nga mga opisyales sa barangay sa dakbayan.

Samtang si Bambi, padayon sa pagbuhagay ang mga isyu nga batok kaniya labi na sa iyang pagdumala sa kapitolyo, ug labi na nga ang anino sa mga binuhatan sa iyang amahan nga si Dongkoy gapdayon og lubad ubos sa iyang ngalan busa dili malikayan nga ga-dalahigon usab ang iyahang ngalan.

Ignon ani gayud ang dagan sa politika labi na nga si Oca ug Bambi parehas nga ginabantayan ang matag lihok nila, ug matag sayop ug “baho” nga gagawas kanunay gatiman-an aron gamiton na sab isip hinagiban sa ilang mga oposisyon sa umaabot na sab nga eleksyon sa 2016.

Ug kung kabalo na unta sila nga ang matag lihok nila kanunay nga gatutokan ug gapangitaan og bikil, arang nga unta ilang pagatiman-an nga dili sila magpataka og buhat og mga lakang nga gamitong isyu batok kanila.

*****

(nefluczon@gmail.com | nefoi.blogspot.com)