USA ka pagpamusil patay ang nahitabo niadtong nilabay’ng adlaw sa Purok-19, Barangay Poblacion, siyudad sa Valencia, probinsya sa Bukidnon.

Giila ang biktima nga mao si Bryan N. Espina, 34, minyo, residente sa Balite, Purok-17A, Hagkol, susamang barangay.

Sa inisyal nga imbestigasyon sa Valencia City Police Station, nasuta nga sakay ang biktima sa iyang motorsiklo niadtong tungora dihang usa ka laing motorsiklo nga sakay ang duha ka mga lalaki ang kalit nga misunod ug mitupad sa motorsiklo sa biktima ug gipusil kini makatulo ka higayon.

Miresulta sa pagkaigo sa ulo sa biktima hinungdan sa iyang hinanaling kamatayon.

Ang suspetsado daling misibat human sa hitabo. Narekober sa crime scene ang tulo ka mga fired cartridge ug duha ka basiyo sa bala sa kalibre 45.

Ang motibo sa pagpamusil padayon pa nga gisuta sa kapolisan labina nasuta nga ang biktima giingong usa ka police character ug nalambigit sa nagkadaiyang pagpanulis ingon man mga carnapping incident sa siyudad ug kasikbit nga probinsya.

Aduna na usab kini kasong criminal nga frustrated murder nga adunay CC# 21137-10; Slight Physical Injury CC# 002-09; Robbery with force upon things CC#-11977-02.

Nasuta usab nga nakagawas ang biktima sa Valencia City Jail niadtong May 29 ning tuig.

Ang kaso giimbestigahan pa ning panahona ni PO3 Ibrahim D. Salvacion sa Valencia City Police Office. (SVB)