ANDAM kanunay ang probinsya sa Misamis Oriental sa panahon nga dunay mahitabo nga mga kalamidad.
Kini ang gibutyag ni Governor Yevgeny Emano atol sa Provincial Risk Reduction Management Summit Series nga gipahigayon sa Grand Caprice, Limeketkai Center ning siyudad sa Cagayan de Oro nga giorganisa sa Office of the Civil Defense-Northern Mindanao.
Matud ni Emano, iyang gipaabot ang iyang suporta ngadto sa nga local chief executives (LCEs) sa nagkadaiyang lungsod sa Misamis Oriental ug kinsa maoy mga nag-unang partisipante sa maong kalihokan.
Matud ni Emano nga nagluhod siya ug nihangyo sa mga mayor ingon man mga bise mayor nga taliwala dili niya linya sa politika iyang hangyo nga pag-abot unta sa kalamidad makigtambayayong kaniya.
Dili manuko sa pagpahibalo kanila ug pagpangayo og tabang tungod kay sa pagserbisyo sa katawhan wala silay gipili nga lugar.
Panawagan usab niini sa mga mayor nga kung unsay kakulangon sa lungsod ipahibalo kanila tungod kay kinahanglan nga magtinabangay sa usag-usa.
Sa press conference, gipangutana si Emano kung unsa kaandam ang probinsya pag-abot sa kalamidad.
Tubag niini nga bisan og karon dayon, adunay kalamidad mahitabo ang probinsya andam kaayo ingon man sa mga behikulo nga naka-ready.
Nasayod na usab ang tanan nga mga department heads uban sa ilang team kung asa sila nga lungsod mopaingon panahon sa kalamidad.
Anaa usab kanunay ang mga inisyal nga panginahanglan sama sa mga food packs.
Gibutyag usab niini nga adunay gigahin ang probinsya nga 6 milyones alang sa mga nagkadaiyang tulay sa Misamis Oriental diin apil na niini ang pag-repair ug pag-declogging sa mga tulay ug diin aduna nay nasugdan karong panahona.
Samtang gikatakda usab tagaan og kapin 400 ka mga barangay og multi-purpose disaster vehicle ug gani aduna nay 52 ang nauna.
Matag usa ka sakyanan mobalor og P1.9 milyones. Dugang ni Emano nga padayon ang ilang pagtabang sa siyudad sa Gingoog nga maoy sagad apektado sa kalamidad.
Usa sa ilang gabantayan nga mga lugar pag-abot sa kalamidad mao ang lungsod sa Balingasag, Balingoan, Medina, Magsaysay ug Gingoog sa este nga bahin.