PATAY ang 9 anyos nga batang babaye human gibundakan og bato, gihiktan og pisi ang liog ug gilugos sa 15 anyos niadtong Miyerkules sa buntag sa Barangay Benhaan, lungsod sa Mambajao, Camiguin.

Giila ang biktima nga mao si Cherry (tinuod nga pangalan gitagoan), nagtungha sa Grade 3, samtang gitumbok nga suspetsado ang 15 anyos nga tawgon sa ngalan nga Rolly, niundang na sa pagtungha ug kutob lamang sa Grade 4.

Ang suspetsado, kinsa boluntaryong mitahan sa Mambajao Police Station, ang misaysay sa nahitabo ug niangkon sa iyang salaod nga gihimo.

Saysay niini nga samtang kamulo siya og tigway sa binuhing kabaw, iyang nakita si Cherry nga nagsag-ob hinungdan iyang giduolan.

Iya kining gitawag apan wala mitingog, hinungdan nga iyang gitabunan ang baba niini.

Ang pisi nga sumpay sa hikot sa kabaw maoy iyang gihikot usab sa liog niini.

Nagsige pa og pangayo og tabang si Cherry apan kay iya man gihugot ang pisi sa liog niini, hinungdan dili madunggan ang tingog sa bata.

Paghidangat sa pangpang nga bahin, daw mikuha kini og bato ug gibundak sa ulo sa biktima.

Dihang nakitang milihok pa giutrohan kini og bundak sa bato usa dayon gipatungan ang biktima ug gilugos.

Human sa insidente giingong iyang gibiyaan ang biktima sa pangpang nga bahin ug nibalik siya sa pagtigway sa kabaw apan giingong nakonsensya siya pag-ayo sa iyang gihimo, hinungdan nga mitug-an siya sa iyang apohan.

Ang biktima, kinsa gipangita sa inahan, napalgan nga nagbuy-od ug naligo sa kaugalingong dugo ug wala nay kinabuhi ug gikasakit pag-ayo sa pamilya niini tungod kay dili mahitsura ang nawong sa bata gumikan sa pagbundak og bato.

Ang suspek kinsa anaa sa kostudya sa kapulisan nangayo og pasaylo sa pamilya ug miingon nga wala siya masayod sa iyang gihimo apan gibutyag sa pamilya nga dili sila makapasaylo.

Tungod kay dili pa kini mapasakaan og kaso, gikatakda kining ikostudya sa Department of Social Welfare and Development.