Manny Rabacal
Pakabana
Kon adunay usa ka tawo nga nakahatag og dakung dungog sa mga Sugboanun siya mao si Fr. Francisco Silva nga inila sa angga nga Padre Paking.
Si Padre Paking mao ang naila na kanhi general manager sa Cebu Electric Cooperatives, Inc. (Cebeco l, ll & lll) diin nakadawat siya og daghang awards matag tuig gikan sa National Electrification Administration (NEA) sama sa Most Outstanding General Manager hangtod nga gipasidunggan siya sa Hall of Famer award. Naila siyang best of the best
sa electrification program sa nasud.
Sa wa pa siya matudlo nga NEA Administrator, nahimo siyang sakop sa NEA Board of
Administrators ug Presidential Adviser on Energy Affairs.
Ang lain niyang pwesto nga iyang gihuptan mao ang pagka-general manager sa Metropolitan Cebu Water District (MCWD) diin iyang gitukod ang Family Park gamit ang
Priority Development Assistance Fund (PDAF) ni Kong. Raul del Mar.
Ang mga Sugboanun nagpasalamat kang Padre Paking sa paghimo sa maong park kay mao kini paboritong suroyanan ug pahuwayanan sa mga tawo labi na panahon nga way trabaho.
Pinapasan nga Benhur Luy files
Bisan sa mga pagduda sa nagkalainlaing listahan nga gikan kang Janet Lim Napoles kalabot sa pork barrel scam alang kanako ang digital files ni Benhur Luy maoy kasaligan.
Anaay kopya niining gitawag og Benhur Luy files ang pamantalaang Philippine Daily Inquirer nga gihatud mismo sa inahan ug mga igsuon ni Luy kuyog sa ilang abogado niadtong panahuna nga si Levito Baligod.
Kining listahan ni Luy maoy gibasihan sa National Bureau of Investigation (NBI) sa pagpasakag kasong plunder batok kang Sen. Juan Ponce Enrile, Sen. Jinggoy Estrada, Sen. Bong Revilla ug Janet Lim Napoles. Mao usab kini gigamit sa gipasakang kasong graft batok sa kapin sa 30 ka mga kongresista ug mga kanhi opisyales sa gobiyerno.
Niadtong unang Miyerkoles, gihatagan og kopya sa Luy files ang Senate blue ribbon committee.
Sumala sa NBI nga adunay ubang mga entries sa maong files nga gipapas apan ila kining na-retrieve.
Ang maong files nagtala sa mga ngan sa 200 ka mga tawo apil na ang mga magbabalaud, department heads, kanhi Supreme Court justice, mga sakop sa media, mga pangulo sa government-owned and controlled corporations, mga empliyado sa nagkalainlaing ahensiya, opisyal sa lokal nga pangagamhanan, mga abugado, mga opisyal sa military, mga taga-show biz, mga empliyado sa duha ka balay-balauranan ug pribadong mga tawo nga gidudahang nakadawat og salapi gikan kang Napoles.
Mahitungod sa pagpapas kun pag-delete sa ubang mga entries, tulo ra ang atong madudahan. Kini mao ang NBI, si Atty. Baligod ug si Luy mismo. Dili ko motuo nga wala tuyoa ang pagpapas niadto.
Nangutana ang ubang madudahon kon may kalabutan ba kini sa pagbuhi ni Luy ug ubang whitleblower kang Baligod isip ilang abogado?
(msr1144@yahoo.com)