KON maghisgot tag hinabang alang sa mga biktima sa kalamidad dinalian gyud na. Apan diay mga hinabang nga nalangan ug natanggong. Nangamatay na siguro ang angayan untang tabangan niini. Dili lang diay ang mga donasyon gikan sa gawas sa nasud nga gipaagi sa Department of Social Welfare and Development (DSWD) ang natanggong karon diha sa Cebu International Port (CIP), apil diay ang nga donasyon gikan sa mga civic organizations sa gawas nga gipa-agi sa ilang mga counterpart dinhi sa nasud. Ang Rotary Club Cebu mireklamo kay dako silag bayrunon sa customs duties aron ma-release ang maong mga relief goods nga naglangkob sa 12 ka mga container vans gikan sa Belgium.
Una niini, ang DSWD naglisod usab pagpagawas sa mga donasyon gikan sa Algeria gumikan gihapon sa dakong bayrunon sa customs duties ug ingon man demurrage o demorahe diha sa CIP. Kanang magbayad ka sa pagpundo sa mga container vans. Tiaw ba nimo kanang mibayad ang DSWD og mokabat ngadto sa P14 milyones. Bag-o lang napagawas ang maong nga donasyon, pito ka buwan human sa bagyong Yolanda. Samtang daghan ang mga gipanggutum nga mga biktima sa kalamidad, daghang mga donasyon ang nangalata gumikan sa bureaucracy sa gobiyerno.
I-ABANDONAR
Si Mr. Philipp Tan, district governor sa Rotary, mireklamo gumikan sa dakong bayronon kay sila man ang consignee sa donasyon gikan sa ilang mga counterpart sa gawas sa nasud. Misurender si Mr. Tan ug dili na siya manggilabot sa maong mga donasyon. Apan misugyot si Cebu Customs deputy collector for operation Paul Alcazaren mga puwede ang mga consignee mo-abandonar sa maong mga cargo ug dayon kompiskahon kini sa kagamhanan ug ang kagamhanan na ang mo-apod-apod niini ngadto sa mga biktima sa kalamidad.
Gihimo sa taga Customs ang pagpaningil og buhis sa maong mga donasyon gumikan sa ilang kasinatian nga adunay nangabot nga mga donasyon gikan sa gawas sa nasud niadtong bagyong Ondoy, apan diay kadto mga smuggled nga mga ukay-ukay. Unsaon man god ning ubang mga smuggler, mosakay man sa panahon. Hala, himoa ninyo ang tanan aron lang mapagawas ang mga maong mga donasyon ug mapahimuslan sa mga angay hatagan. Kini leksiyon sab ni sa umaabot nga mga kalamidad nga dili lang ta magpataka og dawat og donasyon gikan sa gawas sa nasud.
Karon nga naaprobahan na ang gahin alang sa rehabilitasyon sa mga lugar nga naigo sa bagyong Yolanda, makaabot kaha kini sa mga hingtungdan? Puwerting dakoa sa gahin. Dinhi lang sa Sugbo P10 bilyones ang gahin. Siguro ang mga contractors karon nagpanguhit na ni Gov. Junjun Davide aron makakuha og kontrata. Hinaut nga pinaagi niana makabangon ang atong kaigsuonan nga naigo sa kalamidad.
(bobby.nalzaro@yahoo.com)