MIKISAW ang mga transport group sa dakbayan sa Davao sa gikabaniog nga .50 sentimos nga usbaw sa pasahian sa pangpublikong sakyanan, tapus nila nabati nga nagpagawas og lagda ang Land Transportation Franchising and Regulatory Board (LTFRB).

Atong gisabot ang problema sa mga drivers tungod kay mao kini ang ilang gisaligan sa adlaw-adlaw nga panginabuhian, ang pagmaneho.

Ang uban nangarkila og balay ug duna pay mga estudyante.

Apan angay usab sabton sa atong mga drivers nga nag-usbaw man tuod og P11 ang minimum nga suholan sa atong mga mamumuo pero pareho kaninyong mga drivers pait-pait gihapon ang ilang kahimtang, nag-antos sa kamahal sa palaliton ug may mga estudyante usab nga gisuportahan.

Kamo bang mga drivers nagpetisyon sa LTFRB? Kon ang inyong gibasihan ang gibalita sa telebisyon nga dunay usbaw nga .50 sentimos gikan sa P8 ngadto sa P8.50 didto kadto sa Region 1 ngadto sa Region 3.

Ang usbaw sa pasahe, walay labot ang Rehiyon 11. Kon ang inyong gibasihan ang pagmahal sa gasolina, kamo mismo nasayud nga nagdula lang kanunay sa .80 sentimos ngadto sa piso kon duna may pag-usbaw, dili ba? P55 ngadto sa P56 ug mobalik naman ngadto sa P55.

Sa laktod, wala gyud moy rason nga sundugon ang gi-aprobahan sa central office nga gigarantiyahan og .50 sentimos nga usbaw sa pasahe. Pagpuyo mo kay stable ang presyo sa lana sa atong dapit sa Davao.

Gani aduna pay mga drivers nga atong nahinabi nga didto sila magpatubil og gasolina o krudo sa Panabo City tungod kay mas ubos kini og piso kon itandi dinhi sa siyudad sa Davao, ngano? Tungod sa rampant oil smuggling mao nga mas kubos na hinuon ang presyo sa lana didto sa probinsiya kon itandi dinhi sa atong dakbayan sa Davao?

Tambag nato sa mga drivers, magdamayan ta, dili maglamangan kay pareho ra ta kakha-tuka ang kahimtang. Nabuhi mo sa pagpamasada, ug ang mga mamumuo nabuhi usab sa ilang pagpanarbaho.

Makabati gani ta nga nangayo'g ubaw sa pasahian ang pipila ka dapit sa atong nasud, sundog pod ta nga wala man tay labot. Kon dili gyud kalikayan, pagpetisyon usa mo sa ahensiya sa atong gobyerno tungod kay mao kana ang legal nga proseso. Ayaw mo pagpaningil og .50 sentimos sa inyong pasahero kay basi'g masugamak mo sa multa.

Piso lang ang pinakataas nga usbaw sa atong lana karong panahona, tapus pipila ka adlaw mag-rollback gilayon. Busa walay katarungan nga mangayo mo'g usbaw nga .50 sentimos. Kasabot?

Alang sa dugang komento, pag-email sa algenoguin@yahoo.com o superblitadavao@yahoo.com.