MAAYO kining nahunahunaan sa Department of Agriculture, Bureau of Fisheries and Aquatic Resources (BFAR) ug Department of Interior and Local Government Unit (DILG) nga fish ban sa kadagatan sa Davao Gulf.

Dako kini og tabang aron nga mga isda sa kadagatan, ilabi na sa Rehiyon 11 makasanay og maayo ug di mahurot tungod sa pagpanagat ilabi na gyud kining gitawag og commercial fishing.

Ipatuman kini sud sa tulo ka bulan, sugod karong bulana hangtud na sa Agosto kon diin sa maong panahon gitawag kini og "spawning season" sa mga isda.

Ubos sa maong mando, apil sa gidid-an nga managat mao ang mga commercial fishers nga nagagamit og bag net ug ring net methods.

Gawas niini, gidid-an sab ang mga fishing vessels nga nagtimbang og 301 hangtud 150 tonelada kon diin ang makalapas sa maong mando makamulta og P100,000.

Ang gitugotan lang nga pamaagi sa pagpanagat mao ang mga bingwit.

Hinuon, di malikayan nga sud sa maong gidugayon daghan ang maapektuhan ilabi na kadtong mga indibiduwal nga nanginabuhi o nagsalig lang sa abot gikan sa dagat.

Apan kanus-a pa man kita mohimo og pamaagi sa pagpreserba ug pagpasanay sa mga isda sa dagat?

Di na kita magpaabot nga mahurot na ang isda ayha pa kita mohimo og pamaagi. Karon pa lang daan, mohimo na kita og saktong pamaagi samtang duna pay nahabilin nga mga isda sa kadagatan.

Tumanon nato ang maong kamandoan kay alang man sab kini sa kaayohan natong tanan, ilabi na gyud sa mga mananagat.