MAHIBAL-AN na matud pa ang pinal nga desisyon ni Top Rank Promoter Bob Arum gikan kang Juan Manuel Marquez kung mosugot kini nga makigboksing og balik sa ikalimang higayon batok kang Manny Pacquiao sa Nobyembre sa Macau, China.

Matud ni Arum, nakatakda silang magpulong karong adlawa sa New York ni Marquez tungod gi-imbitahan niya kini alang sa away sa Dominggo tali kanila ni Miguel Cotto ug WBC middleweight champion Sergio Martinez.

Una nang milutaw kaniadto nga nagpanikad si Pacman nga makaharong og balik si Marquez aron makabalos sa iyang pagkapildi niadtong tuig 2012.

Apan di na sumala pa interesado ang Mexican legend nga kontrahon pa si Pacquiao.

Apan di gihapon mosurender si Arum nga kombinsihon si Marquez ug gusto niya madungog mismo nga personal kung unsa ang pinal niyang desisyon.

Kung di madayon ang Part 5, gibutyag sa Top Rank ang mga posibleng pilian ni Pacman nga awayon sama kang undefeated nga si Danny Garcia, ang Russian champion nga si Ruslan Provodnikov ug uban pa.