DAVAO DEL SUR - Usa ka command conference ang gipahigayon sa Davao del Sur Provincial Police Office (DSPPO) diin gipangulohan kini ni Governor Claude Bautista, uban sa mga opisyal ug mga hepe sa 14 ka munisipyo ug siyudad sa Digos niadtong Miyerkules.
Sa maong tigum, gimando ni Bautista ngadto sa kapulisan ang paspas nga imbestigasyon sa sagunsong pagpamatay sa siyudad sa Digos niadtong bulan sa Mayo.
Ang marching order ni Bautista nagtumong sa pag-ila ug pagdakop sa mga suspek ingon man ang mga mastermind.
Gitataw ni Bautista nga angayang magtinabangay ang tanang kapulisan sa probinsiya aron pahugtan ang seguridad.
Giklaro sa gobernador nga buot niyang mailhan ang mga notadong hitman ug mga gun-for-hire nga naglihok sa probinsiya.
"Dili na ni binuang ilang gihimo nagdala sila og kasamok sa probinsiya so kinahanglan nga madakpan ning mga tawhana," ang marching order sa gobernador ngadto sa kapulisan.
Samtang gikanayon ni Senior Superintendent Michael John Dubria, direktor sa DSPPPO nga andam silang motuman sa mando sa amahan sa probinsiya.
"The intention of the governor is to clean Davao del Sur against lawless elements and that is what we are trying to do now for the province and then by the directive of the governor to identify or neutralize these bad elements here so eventually we will be having a safer Davao del Sur province in the future," ni Dubria.
"Actually, dili man ta disappointed kay sa short time naa na'y na-file na kaso sa kadtong pirmero nga nahitabong patay, meaning ang pulis naglihok gyud wa nila gibalewala ang nahitabo. I recognized their effort ni kay dili ni sayon ug dili ni dali nga problema kay mora'g naa ni siya'y ginatawag nato nga programa kay nganong nahitabo nga ing-ani kapaspas ug ing-ani kadako ang nahimong sitwasiyon," asoy ni Bautista.
Hinuon, aduna na say suspek ang Digos City Police Office sa nagpusil patay kang Labajo ug gihuptan na nila ang composite artist sketch apan wa gipugngan ni Bautista nga ipaguwa kini sa publiko aron masegurong kongkreto ang mga ebidensiya sa pag-ila sa suspek.
"Lisud man kon mohatag na og ingon niana nga klaseng impormasyon unya ultimo ang police dili pa makaseguro kon mao gyud na siya o dili kay as per nahitabo prior ani, kadtong kang Sammy Oliverio naghatag sila og cartographic sketch sa suspek afterwards pagkahuman ila pod gibawi kay dili diay to mao so di ko gusto nga mausab to nga mali ang impormasyon nga atong ihatag unya dili mao," pagklaro sa gobernador.
Atol sa command conference, gihatagan og importansiya ni Bautista ang iyang direktiba nga pahugtan gyud ang monitoring aron di na masundan pa ang nahitabong pagpamatay sa dakbayan.
Nasayran nga aduna na say nagtikaw-tikaw nga non-uniformed personnel gikan sa intelligence section ang gipakatag sa probinsiya aron nga maniid sa mga kriminal. (Orlando B. Dinoy)