MATANAO, Davao del Sur - Moabot ngadto sa 20 ka mga pulis sa Matanao Police Station ang gipailawom sa surprisang drug test sa mga sakop sa Scene of the Crime Operatives (Soco) niadtong Huwebes.

Gisaksihan mismo sa Superbalita Davao, gikanayon ni Senior Inspector Sheryl Raotraot, hepe sa Soco, ang maong drug test pinasubay sa mando mismo ni Senior Superintendent Michael John Dubria, direktor sa Davao del Sur Provincial Police Office.

Kini aron nga masayran kon duna bay kamatuoran ang alegasyon sa mga rebeldeng New People's Army (NPA) nga pipila ka sakop sa Matanao PNP naggamitan og ilegal nga druga nga maoy gibasehan sa ilang pagpangatake niadtong Marso 10 nga gikamatay sa duha ka pulis ug pagkaangol sa lain pang tulo.

Giangkon ni Senior Inspector Elmer Cabuslay, hepe sa Matanao PNP nga nasurprisa sila sa drug test.

Hinuon, matud ni Cabuslay nga mas maayo kini aron mahinloan ang pangalan sa ilang istasyon nga giduhig sa gidiling druga.

Nasayran nga ang pundo sa gihimong drug test nagagikan sa Camp Crame sa kaulohan mao nga libre ang eksaminasyon sa ihi sa kapulisan.

Gibantayan sab sa Soco ang pagpangihi sa mga pulis aron masegurong di peke ang mahatag nga sample.

Suma ni Raotraot ugaling mag-positibo ang usa ka pulis sa paggamit og gidiling druga, mga labaw'ng opisyal na sa kapulisan ang mohatag og tukmang silot kaniya.

"We're just here to conduct drug test depende na unya na sa atong provincial director ang mogawas nga resulta.

Sa mga hi-tech nga kahimanan sa inspeksyon masayran kon druga o medisina nga ginatumar sa kapulisan ang mogawas sa eksaminasyon karong sunod semana. (Orlando B. Dinoy)