GIPAHIMUSLAN sa host San Antonio Spurs ang senaryo nga nakasinati og cramps ang labing pambato sa back-to-back champion Miami Heat nga si LeBron James aron pag­poste og 110-95 nga kadaugan sa Game 1 sa National Basketball Association (NBA) 2014 Finals.

Ang Spurs ningpabuto og makabungog nga 31-9 sa 4th quarter dihang gihasol si James sa cramps nga iyang nasinati.

Ang kainit sulod sa AT&T Center tungod kay naguba ang air-condition niini maoy usa sa mga hinungdan nga na-cramps si James.

Sa nahabiling 7:31 minutos, naahat ang Heat nga palingkuron si James tungod sa cramps niini. Niining mga gutloa, naglabaw ang Heat, 86-84, ug nainat pa kini sa 88-84 pinaagi sa puntos ni Dwyane Wade sa nahabiling 6:31 minutos.

Human niini, nagsugod ang pag­bangon sa Spurs nga gibuwakan og duha ka sunodsunod nga three-point shots ni Danny Green ug nailog nila ang labaw, 94-90, sa nahabiling 4:36 minutos.

Niahat pagsulod og balik si James ug nakapuntos pa kini aron pahakan ang labaw sa Spurs, 94-92, apan sa nahabiling 3:59 minutos, gi-cramps na sab ang four-time MVP ug ning higayuna, wala na siya nakabalik.

Human niini, ningbulhot ang opensa sa Spurs ug ninglahos na kini paingon sa hingpit nilang kadaugan.

“I was going to try to give it a go, and [coach Erik Spoelstra] said no,” matod ni James. “It sucks at this point in time in the season. ... It was frustrating sitting out. .. My muscles spasmed 10 out of 10. The best thing for me to do was not move.”

Gipangulohan ni Tim Duncan ang kadaugan pinaagi sa iyang double-double 21 puntos ug 10 rebounds samtang si Tony Parker, kinsa gidudahan nga makasugod sa series tungod sa iyang angol sa tiil, niamot og 19 puntos.

Ang kauban nila ni Duncan ug Parker sa Big Three sa Spurs nga si Manu Ginobili nidugang og 16 puntos ug 11 ka assists.

Sikit ang kombati sa nag-unang tulo ka quarters ug nagpulipuli sa paggunit sa labaw sa duha ka mga kampo.

Gipasabot ni Spoelstra nga ti­nguha pa gyud unta ni James nga mobalik og duwa sa hinapos nga bahin dihang upat pa lang ka puntos ang labaw sa Spurs apan wala na kini niya pasudla.

“It felt like a punch in the gut when you see your leader limping back to the bench,” asoy ni Heat coach Erik Spoelstra. “At one point, he was getting back up with 3 1/2 minutes to go. I looked at him and said, ‘Don’t even think about it. You can’t even move.’”

Ang usa sa mga pambato sa Heat nga si Ray Allen miklaro nga gawas sa kainit, dili sab maayo ang ilang duwa sa opensa ug depensa hinungdan sa ilang kapildihan.

“We made mistakes. We didn’t execute at both ends,” pasabot ni Allen.

Ang Game 2 ipahigayon karong Lunes (RP time) sa balwarte gihapon sa Spurs.

“I’m sure both teams are going to be happy to have a couple of days before the next game,” asoy ni Spurs coach Gregg Popovich.

Puntos matag usa

San Antonio (110) - Duncan 21, Parker 19, Ginobili 16, Splitter 14, Green 13, Leonard 9, Belinelli 9, Mills 7, Diaw 2

Miami (95) - James 25, Wade 19, Bosh 18, Allen 16, Lewis 10, Chalmers 3, Andersen 2, Cole 2. (Reuters)