SA mga pribadong eskwelahan gawas sa CCTV camera hugot nga siguredad ang gipatuman sa mga blue guards. Gawas sa nagbantay sa main entrance duna pa’y nag-roving ug kadtong gi-posting sa likod nga agianan.
Hinuon moingon man pagsulti ang uban nga wala man kinahanglana ang daghang gwardiya diha sa mga pubkikong eskwelahan kay wala may hulga sa ilang siguredad. Sa mga pribadong eskwelahan naa man diha mag-eskwela ang mga anak sa politiko, negosyante ug ubang halangdong tawo sa katilingban. Delikado nga dunay mga dautang tawo nga mag interes pagpasakit. O mangidnap pa kaha.
Gitug-an ni Sr. Supt. Richie Posadas, pangulo sa CIDG-7, diri nako nga sa nanglabayng katuigan duna gyuy tinun-an sa usa ka pribadong tunghaan ang gidagit aron ipalukat.
Kidnap for ransom. Mao nga ang tambag ni Col. Posadas sa mga ginikanan pananglit may problema nga motumaw labot sa siguredad sa inyong mga anak ipahibalo kana sa eskwelahan ug sa mga pulis. Ang uban ini nga problema gitawag og domestic violence.
Basin dunay mga amahan o inahan nga mokalit ug butho sa eskwelahan unya sa pinugos nga paagi kuhaon ang bata. Ang problema diay kay ang papa ug mama nagkabulag ug ang kustodiya sa bata ang gilalisan. Nia dinhi usahay motumaw ang problema diha sa mga tunghaan. Siguro ang papa o mama motunga ug sa way pupananghid gikan sa yaya isakay sa sakyanan ang bata. Ang makakita magtuo nga gidagit ang bata. Ug ang moabot nga report sa pulis dunay kidnapping nga nahitabo.
BUKID
Didto sa bukid ang akong nakita didto nga tigbantay sa eskwelahan mga tanod ra gyud.
Ang lain nako nga gustong pabantayan mao kining mga bata nga magbaklay sa transcentral highway padulong sa ilang eskwelahan.Gahapon nakasuroy ko sa pipila ka eskwelahan sa may trans central highway. Akong napanid-an nga kanunayng naa sa peligro kining mga bata nga nagbaklay. Ang mga sakyanan sab didto bisan dili daghan kusog sab kaayo mopadagan ang mga driver. Manghinaot lang ta nga sa mga driver nga moagi sa maong karsada unya matayming nga naay mga bata nga nagbaktas unta dobling pag-amping ang inyong buhaton.
TUGNAW
Basin naa moy ginamit o wala pa gyud magamit nga raincoat. Ato ni nga tigumon ug atong iapud apud sa mga tinun-an sa bukid. Sa akong nakita didto pait ang ilang kahimtang ning panahon nga sige na ang ulan. Gawas nga ting-ulan tugnaw pa gyud ang agianan padung sa eskwelahan.
Kung maabtan ug ulan mosamot kalisod. Tawge ko sa 3184162 kung may ika tampo mo.