UNFAIR ug dili makiangayon kining pagbutyag sa pipila ka barangay kapitan nga adunay 20 ka mga pulis sa Talamban Police Station ang nagprotehir sa mga tigpayuhot og gidiling drugas.

Unfair tungod kay wala nila ibutyag ang mga pangalan sa maong mga pulis nga nakaduhig na hinuon sa reputasyon niadtong mga tarong nga mga tinugyanan sa balaod sa maong police station.

Atol sa Police Coordinating Advisory Council meeting nga gipahigayon sa Barangay Talamban niadtong Martes natuki kining maong isyu diin piho ang mga kapitan nga mialegar nga may 20 ka mga pulis sa Talamban nga nagdawatan og kuwarta gikan sa mga drug personalities.

Way igong ebidensiya nga gikapresenta batok sa 20 ka pulis ug wa usay gihinganlan og si kinsa kining mga pulisa.

Hinaot nga mo-coordinate ang mga kapitan ug makahatag sila og saktong mga pangalan sa mga pulis bisan ngadto na lang sa PCAC aron kahatagan kini og dinaliang aksyon.

Si Sr. Insp. Bienvenido Miral, ang hepe sa Talamban Police Station, hugot mihimakak sa taho nga wa silay gihimong drug operation sa ilang hurisdiksiyon ilabi na sa bukirang dapit.

Ingon niya nga semana pa lang gani human siya maasumir pagka-hepe sa Talamban niadtong Pebrero mipahigayon gilayon siya og sunodsunod nga pagronda ilabi na sa Barangay Pulangbato nga maoy gikataho nga grabi ang paghitak sa gidiling drugas.

Pero matod pa niya nga padulong pa gani sila sa mang lugar anaa nay mosumbong nga dunay ipahigayon nga raid sa maong barangay.

Di kaha nga pulis ra sab ang mopahibawo ngadto sa mga tigpayuhot og drugas nga dunay raid?

Nganong Talamban police ra may gi-single out sa meeting?