NAGKAKUSOG ang panawagan karon nga padaganon sa pagka-presidente sa nasud si Mayor Rody Duterte karong 2016 election.

Kini bisan pa man sa kanunay nga pagbalibad sa mayor nga di siya magpapili nga presidente tungod kay dako kini nga responsabilidad alang kaniya.

Ning ulahing katikaran, dunay mga dagkong opisyal sa Mindanao ang nag-awhag na kang Rody nga modagan sa pagka-presidente gumikan kay ilang nakita nga ang mayor lang nagbaton og katakus sa maong posisyon.

Buot sab nilang taga-Mindanao na ang ma-presidente sa nasud aron nga molambo ang isla, di lang bahin sa ekonomiya apan sa inprastraktura ug sa hisgutanang kahapsay ug kalinaw.

Ang Rody Duterte for President Movement nga gipangulohan ni Mar Masanguid, kapitan sa Barangay R. Castillo ning siyudad, uban sa daghan pang mga kapitanes ug suporter, hagbay nang misuroy sa nagkadaiyang dapit sa Mindanao aron nga mokalap og pirma aron sa pag-awhag sa mayor.

Apan hangtud karon, mibalibad pa gihapon si Rody nga modagan sa pagka-presidente sa nasud.

Gani, nagbahad pa siya nga moretiro sa politika sa 2016 aron nga maundang na ang panawagan ug mahapsay na sab ang hunahuna sa mga presidentiables.

Hinuon, di pa matataw kon mao na ba gayud kini ang baruganan sa mayor gumikan kay layo pa man ang 2016.

Mao na nga hulaton una nato nga moabot ang 2016 aron nga maklaro kon modagan ba gyud siya o di isip presidente sa nasud.