COTABATO CITY -- Grupo sa Bangsamoro Islamic Freedom Fighters (BIFF) ang gitudlong suspek sa pinakaulahing pagpamomba alas 12:20 sa udto niadtong Huwebes didto sa probinsiya sa Maguindanao.

Giila ni Colonel Donald Hongitan, commanding officer sa Philippine Army 45th Infantry Battalion, ang napatay nga sundalo nga si Private 1st Class Renald Tabihe, drayber sa KM 50 Military truck.

Samdan sab sila si 1st Lieutenant Lemuel Manicdo, T/Sgt Pio Hunuldang, ug Corporal Joel Kanseran.

Gibutyag ni 6th Infantry (Kampilan) Division spokesman Colonel Dickson Hermoso nga mga sundalo nga sakop sa Charlie Company gikan sa Camp Omar nga naghatud sa mga Teduray nga namalik na sa ilang bay.

Apan pag-abot nila sa Barangay Maitumaig, Datu Unsay, mibusikad ang usa ka improvised explosive device (IED) nga maoy hinungdan sa kamatayon ug pagkaangol sa mga biktima.

Sa pagsusi sa mga sakop sa Explosive Ordnance and Disposal Team sa Philippine Army, ang IED gama sa usa ka bala sa 105mm Howitzers Cannon nga dunay 9 volts battery ug cellphone isip triggering mechanism.

Niadtong bulan sa Mayo, usa sab ka bomba ang mibusikad atol sa pag-agi sa convoy ni 1st Mechanized Brigade commander Colonel Gener Del Rosario sa tulay sa Datu Unsay, diin usa ka sundalo ang napatay ug upat ang naangol.

Giangkon ni Bangsamoro Islamic Freedom Movement nga sila ang namomba ug dili sila mohunong hangtud nga dunay mobabag sa ilang gipakigbisugan.

Gihugtan karon ang pagbantay sa mga pulis ug militar sa mga dapit sa Maguindanao nga punting sa pagpanghasi sa mga rebelde. (Edgar Fuerzas)