DAVAO DEL SUR -- Nagtuo si Governor Claude Bautista nga daghang mga magbabalaod ang nalambigit sa pork barrel scam nga minaubra ni Janet Lim-Napoles.
Si Bautista nga unang nahimong representante sa Segundo Distrito sa Davao del Sur (karon Davao Occidental) niadtong tuig 2001-2007, miangkon nga nahimong suod sa ilang pamilya si Napoles.
Miangkon si Bautista nga gihanyagan siya og mga proyekto gikan sa mga ahente ni Napoles dihang sakop pa siya sa Kongreso.
"The usual take was 40-60," butyag ni Bautista.
Buot ipasabot nga ang 40 porsiyento sa proyekto moadto sa bulsa sa mga magbabalaod ug ang 60 porsiyento mopadung sa mga pekeng organisasyon ni Napoles.
Apan nagdumili ang gobernador nga hinganlan kinsa ang mga nakig-transaksiyon kang Napoles ug iyang mga pekeng non-government organizations (NGOs).
"I was not present when they possibly made the deal with her, so how could I be sure that this or that lawmaker made money?" niya pa.
Hugot sab nga gibarugan ni Bautista nga wa siya modawat og bogus nga proyekto gikan sa pork barrel.
"I had no way of knowing who made cash out of their PDAF (Priority Development Assistance Fund). What I am always sure of is that I was never one of them," asoy niya.
Giklaro ni Bautista nga una niyang nakaila si Jimmy, ang bana ni Napoles, pipila na ka katuigan kon diin ang iyang amahan nga si Benjamin mao pay kongresista sa Davao del Sur.
Suma sa gobernador, si Jimmy nangayo og tabang sa mga Bautista mao nga nahimo nang suod kanila ang mga Napoles.
Apan bisan og nahimong suod ang pamilya ngadto kang Napoles, wa mosugot ang mga Bautista nga mahimong kabahin sa anomalusong transaksiyon. (Orlando B. Dinoy)