HUMAN nabalita nga dunay law-ay nga panghitabo sud sa Osmeña Park ning siyudad sa Davao diin dunay mga masahista nga nagtanyag og "oral sex," wa nay mitingog kanila kagahapong adlawa labot sa maong isyu.

Ang impormasyon gikan ni City Health Office-Environmental and Sanitation Division chief Robert Oconer atol sa I-Speak Forum.

Suma niya nga dunay prostitusyon nga nanghitabo sa maong parke subay sa ilang gihimong dayalogo sa siyam ka mga asosasyon.

"Na-ay niduol sa akoa ug misumbong. Ingon niya: 'Sir Robert, di na namo makaya ang gihimo sa uban diha, gibaboy na among trabaho," suma ni Oconer.

Dugang sa opisyal nga samtang magpamasahe ang kustomer nga lalaki, hanyagan og oral sex sa masahista sa kantidad nga P50 nga pagmasahe ug dugang P150 aron mahatag ang extra service.

"Napamatud-an namo mismo atubangan ni Dr. Villafuerte nga miangkon gyud siya (nagreklamo) nga dunay prostitution sa dapit," sulti sa opisyal.

Dunay 80 ka mga masahista ug 30 ka mga manekyurista nga papahawaon sa lugar diin ipailawom sa rehabilitasyon.

Gipakisayran silang tanan sa Superbalita kagahapon kung unsa ang ilang reaksyon sa maong isyu, apan tak-um na ang ilang mga baba. (Jeepy P. Compio)