PADAYONG gitun-an sa kapulisan ang mga ebidensiya ug testimonya sa mga saksi sa pagpatay sa usa ka abogado niadtong Mayo 30, 2014.

Kini ang gibutyag ni Davao City Police Office Director Vicente Danao Jr. sa pakighinabi sa mga tigbalita labot sa pagpatay kang Atty. Emmanuel Ledesma Acuña Jr. didto sa parking lot sa BPI, SM Lanang Premier.

Sa gihimong imbestigasyon sa kapulisan, migawas nga love triangle ang motibo sa pagpatay sa biktima.

Unang giingon sa kapulisan nga ang suspek sa krimen mao ang kanhi hinigugma sa karelasyon sa abogado.

Human nabalita ang maong katahap sa kapulisan, usa ka tawo ang mipatim-aw sa kapulisan, Huwebes sa hapon.

Si Danao nag-ila kaniya nga si Francis Gerald Ang kinsa giubanan sa pamilya ug abogadong si Alexis Lumbatan.

Sumala ni Ang, buot lamang niyang limpyuhan ang pangalan sa maong hitabo sanglit wa siya kalabutan sa maong krimen.

Sa maong hitabo, naduhig ang pangalan sa usa ka Joan Tan kinsa maoy nakarelasyon ni Acuña, apan nagbulag na sila.

Hinuon, wa pa sab masayri sa kapulisan sa Sasa kung duna bay relasyon sila Tan ug Ang.

Tungod niini, gikondena karon sa Union of Peoples' Lawyers in Mindanao ang kamatayon ni Acuña. (Jeepy P. Compio)