SULOD 24 ka tuig nga pagtagu-tago, nasikop na gyud sa awtoridad ang usa ka amahan nga miabanduna sa iyang mga anak.
Alas 9:40 sa buntag niadtong Martes nasikop ang amahan nga si Miguel Cagampang Bahinting, 53, minyo, ug nagpuyo sa Purok 5, Barangay Cadalian, Baguio District.
Ang suspek dunay pending nga warrant of arrest nga gipagawas ni Judge Ramon B. Tupas sa MTCC Branch 2, ubos sa criminal case number 2,101-B-M nga pinetsahan Disyembre 26, 1990.
Dihang nasiplatan si Bahinting, gisilbi dayon sa Baguio Police Station ang warrant og arrest sa suspek.
Si Bahinting nakalapas sa Article 59 in relation sa Article 60 sa Presidential Decree 603 sa Revised Penal Code.
Gidemanda siya tungod sa paglapas Chapter IV (Liabilities of Parents) Art. 59 tungod sa pagpasagad ug pag-abandona sa iyang mga anak.
Sa mga mosupak niini, mamahimo silang mapriso sa duha hangtud unom ka bulan ug pagmulta sa di motaas sa P500.
Ang suspek temporaryong gibalhog sa prisohan samtang naghuwat sa sunod mando sa korte labot sa iyang kaso.