USA na usab ka pagpanglungkab ang natala sa Police Station 3 (PS3) sa Agora sa Zone 6, Osmeña Extension, Barangay 26 ning siyudad sa Cagayan de Oro niadtong milabayng’ adlaw.

Giila ang biktima nga si Ivan Amila, 30, ug residente sa susamang dapit diin nahitabo ang pagpanglungkab.

Gisaysay sa biktima nga nahitabo kini sa dihang wala siya sa iyang pinuy-anan mga alas 5:00 ngadto sa alas 6:00 sa hapon.

Dugang pa niini nga giguba ang door knob ug gidala sa mga wala mailhing suspetsado ang iyang mga mahalong gamit sama sa usa ka sling bag nga adunay sulod nga P500 cash, usa ka Samsung Tablet nga nagkantidad og P13 mil.

Nabitbit usab sa suspetsado ang iyang Motorola cellphone (black). Ang mga nabitbit nga mahalong gamit anaa nahimutang sa sala sa iyang puluy-anan.

Kahinumduman nga sunod-sunod na ang mga nahitabong pagpanglungkab ning siyudad. (KCS)