DUHA ka mga lalaki nga sakay sa motorsiklo ang nilabni sa bag sa usa ka babaye mga alas 6:15 sa gabii niadtong niaging adlaw sa Limketkai Center, Barangay 35 ning siyudad sa Cagayan de Oro.
Si Josette Mercedes Cellona, 45, minyo ug lumulupyo sa 151 Tomas Saco St., ning siyudad nitaho sa Police Station 2 (PS2) sa Cogon nga sa iyang pagkanaog sa iyang sakyanan kalit nga gibira sa mga suspetsado ang iyang shoulder bag nga dark blue ang kolor.
Wala nagsuot og helmet o bonnet ang mga suspetsado ug deretsong nisibat sa wala matino nga dereksyon.
Sulod sa maong bag ang P40 mil ug mga ATM cards sa BDO, duha sa BPI, G-Cash, Oro Integrated ATM, credit card BPI ug Metrobank, Metrobank company check, Ipad/Booklet, parker ballpen, spare keys of Health Check clinic, spare key pick-up, driver’s license, PRC ID, SSS ID, SM gift Check nga nagkantidad ug P500, retainer ug company ID.
Padayon pa nga gisunod sa kapolisan sa Cogon ang lain na usab nga kasong pagpanglabni.