SWERTE na lang nga nasapon sa inahan ug dali nga natabang ang usa ka 10-anyos nga bata samtang kini nagbitay ug naghikot sa iyang liog sulod sa lawak kagahapon mga alas 7:30 sa buntag.
Nagtulo ang laway dihang nakita sa iyang inahan si Jhon Paul Villaplana, residente sa Barangay Opol, MIsamis Oriental.
Gisaysay ni Rowena, 37, inahan sa biktima nga sa wala pa nahitabo ang insidente iyang gibunalan ang iyang anak tungod kay dili moeskwela ug dili motingog pangutan-on kon unsa hinungdan.
Tungod sa kalagot sa inahan giingong iya na lang gibunalan ang ilang dingding ug gipugos pagpatingog ang iyang anak hinungdan nga nakasulti ang bata nga dili na siya moeskwela tungod kay gikasab-an ug gibunalan siya sa maestra.
Giingong gibunalan sa maestra ang tiil sa bata ginamit ang kawayan bisan og wala siya naglihok-lihok.
Tungod niini, aron pagpahungaw sa kasuko sa inahan giingong mikanaog kini sa silong ug nakighinabi sa iyang silingan kung unsa iyang buhaton sa iyang anak nga dili na moeskwela.
Samtang nakighinabi ang inahan, dunay iro nga nisaka sa ilang balay hinungdan nga gisunod kini sa inahan aron pagawason ug dinhi iyang gipangita ang iyang anak pamasin nga nag-ilis na aron moeskwela.
Apan dako na lang ang kakurat sa inahan dihang nakita ang iyang anak nga nagbitay gamit ang bakos niini ug dali niya kining giluwas ug gidala sa center apan gisuo kini sa Northern Mindanao Medical Center (NMMC) ning siyudad sa Cagayan de Oro.
Dugang ni Rowena nga sumala sa iyang anak giaksyonan pa siya og bunal sa iyang maestra sa dos por dos nga kahoy.
Tungod ning hitabo, buot estoryahon sa inahan ang maong maestra kabahin sa gisulti sa iyang anak ug nakadesisyon nga hunongon na lang una sa pagpatungha ang bata.
Kasamtangang giatiman pa si Jhon Paul sa mga doctor sa NMMC ug hinuon luwas na kini sa makuyaw nga kahimtang.