TIGUWANG nga babaye nga paingon na mosimba ug wa mosaka sa skywalk nadasmagan sa usa ka utility vehicle ug nalatayan pa sa de pasaherong bus pasado alas 5 sa kaadlawon atubangan sa simbahan sa Pardo, dakbayan sa Sugbo.
Ang sakyanan nga unang nakadasmag sa biktima nisibat ug wa pa motahan atol ning pagsuwat.
Ang namatay giila sa kapulisan nga mao si Teresita Montebon, 71, taga dan F. Jaca, Barangay Inayawan, siyudad sa Sugbo.
Ang gitumbok nga unang nakadasmag kaniya mao ang usa ka gituohang Tamaraw FX nga may plate number GGT-864.
Human maigo si Montebon, naligsan siya sa Corominas bus nga may plate number GJT-465 nga gimaniho ni William Apura, 33, taga Tuyom, siyudad sa Carcar.
Sa pasiuna nga imbestigasyon ni SPO4 Nelson Jayme sa Cebu City Traffic Division, nagkanayon nga nagbarog sa center line ang biktima paingon na unta motabok paingon sa simbahan aron mosimba.
Apan naigo siya sa Toyota Tamarraw FX nga nagdagan gikan sa south paingon sa siyudad.
Nalagpot ang biktima ug didto kini paingon sa bus nga gimaniho ni Apura.
Human sa hitabo, ang wa mailhing driver sa Tamarraw FX nisibat kini sa maong dapit human masayud nga may naigo siya nga tawo.
Si Apura nitahan sa kapolisan ug gipaubos pa sa imbestigasyon.