GIKONBIKTO sa Sandiganbayan First Division si Aloguinsan, Cebu Mayor Cynthia Moreno ug laing pito ka mga opisyal sa lungsod sa kasong kalapasan sa Anti-Graft and Corrupt Practices Act labot sa pagpalit og aluminum composite panels niadtong 2007 alang sa pagpanindot sa munisipyo.

Sa 28 ka pahina nga desisyon sa 1st Division sa Sandiganbayan nga gipakanaug niadtong Hunyo 5, 2014, kini nihukom nga ang incumbent mayor sa lungsod ug ubang mga akusado sad-an sa kalapasan sa Section 3(e) sa Republic Act 3019 human giingong wala moagi og public bidding ang ilang pagpatuman og metal cladding project sa munisipyo.

Gawas ni Moreno, apil sa gikonbikto sa korte sila si municipal civil registrar ug Bids and Awards Committee (BAC) chairman Pepito Manguilimotan, municipal budget officer ug BAC vice chairman Nonel Villegas, municipal agricultural officer Marilyn Flordeliza, laing BAC member Gertrudes Ababon, municipal assessor John Lim, municipal engineer ug pangu sa technical working group Orven Nengasca ug laing BAC member Emilia Luz Celis.

Sila gisentensiyahan nga mabilanggo og unom ka tuig ug usa ka buwan hangtod sa napulo ka tuig ug did-an nga makatrabaho sa gobiyerno.

Ang kamandoan pirmado nila ni Associate Justice Efren de la Cruz, chairperson sa Sandiganbayan 1st Division; ug Associate Justices Rodolfo Ponferrada ug Rafael Lagos.

Ang mayor niangkon nga nasurprisa siya sa desisyon apan wala siya nagtuo nga adunay bulok-pulitika ang iyang pagkakombikto.

“Pag-abot sa desisyon nasurprisa jud ko because I thought it will favor us...I don’t consider this as a setback but I am considering this as a challenge,” padayag sa mayor dihang nahinabi sa Sun.Star Superbalita kagahapon.

Si Moreno ug kaubanan nakapiyansa na og tag P30,000 matag usa niadtong Huwebes sa Sandiganbayan alang sa ilang temporaryo nga kagawasan.

Sila gihatagan og 15 ka adlaw pag-apilar sa desisyon sa Sandiganbayan.

Si Moreno masaligon nga makalingkawas sa silot sa iduso unya nga motion for reconsideration sa iyang mga abogado pinangulohan ni Allan Geotina.

Siya nibarog nga way anomaliya sa ilang gipalit nga aluminum composite panels niadtong 2007 nga adunay kinatibuk-ang kantidad nga P 1,118,635.30.

Nagsugod ang kaso human si kanhi Aloguinsan Councilor Felimon Georsua, ang kihante, nireklamo nga wala mopahigayon og bidding ang nalambigit nga mga opisyal sa gipalit nga aluminum composite panels.

“Nalipay pud ko nga na-change ang administrasyon kay ang Sandiganbayan karon dili madala og kwarta,” pahayag sa kanhi konsehal dihang nahinabi sa mga tigbalita.

Dugang sa desisyon sa Sandiganbayan, nasuta sa post-audit ni Odon Sususco, state auditor sa Commission on Audit (COA) VII, ug kaubanan, base sa gipahigayon nga site inspection niadtong Nobiyembre 26, 2007, ilang nadiskobrihan nga 50 porsiyento pa ang katukoran sa proyekto apan ang hingpit nang nabayran ang supplier.

Ang mayor nagtuo nga dili mohimo og kasamok ang ilang mga dumadapig ug modawat sa desisyon sa Sandiganbayan sanglit moapilar sila sa maong hukom.