GIKATAKDANG moabot karong buntag sa Manila ang sentro sa Brooklyn Nets nga si Andray Blatche sa labing unang higayon gikan niadtong gikuha siya aron makatabang sa Gilas Pilipinas.
Mao kini ang gibutyag ni national coach Chot Reyes pinaagi sa iyang Twitter account @coachot kagahapon sa buntag.
“He’s on the plane. Arriving tom, 10 a.m. @drayblatche is coming to town,” tweet ni Reyes.
Pagkataodtaod, mitubag og tweet si Blatche sa iyang Twitter account @drayblatche: “Kumusta Manila #LabaPilipinasPuso! @coachot.”
Mitubag sab dayon si Reyes, “AYOS! C u soon Dray!.”
Nagkanayon si Reyes nga mga duha o tulo lang ka mga adlaw si Blatche dinhi sa nasod.
Asoy ni Reyes nga nagtinguha si Blatche nga makighimamat sa congressmen ug mga senador nga naglihok aron mapasaka ang House Bill nga mag-naturalize niya.
Masaligon ang Samahang Basketbol ng Pilipinas (SBP) nga ma-finalize na ang tanan kabahin sa pag-proseso niini.
Ang pirma na lang gyud ni Presidente Noynoy Aquino mao ang kuwang ug hingpit nang mahimong Filipino citizen si Blatche.
Si Blatche gikuha sa SBP aron makatabang sa kampanya sa Gilas alang sa Fiba-World Cup sa Spain karong Agusto ug Asian Games sa Incheon, Korea karong Septiyembre. (ESL)