Mongaya: Gikiha na!
BAHALA'G dugay nasang-at ang kihang plunder batok nilang Senador Juan Ponce Enrile, Ramon Revilla Jr., ug Jinggoy Estrada uban nilang Janet Lim-Napoles, kanhi chief of staff ni Enrile nga si Gigi Reyes, ug lain pang upat ka mga suspek.
Atong masabot nga igo na ang mga ebidensiya ug lig-on na karon ang mga kasong plunder batok kanila tungod sa pagkawat sa binilyon nga PDAF.
Ug makaingon kita nga makasaysayon ang maong pagsang-at. Sa unang higayon, dunay mga senador nga gipangkiha og pagpangawat sa kaban sa nasod. Abi gyud nato nga di kini mahitabo kay mopalihok man sab sa ilang katigayonan kining mga adunahang opisyal.
Sa pagkakaron, makadungog na kita sa mga reklamo nga duna kiniy bulok sa politika kay nganong ang mga naa sa oposisyon ug kaalyado pa gyud ni Bise Presidente Jojo Binay ang gikiha.
Daw gipangpiangan na ang mga lig-ong haligi sa political coalition ni Binay sa iyang tumong nga mahimong sunod nga presidente sa Pilipinas.
Daghan man gud ang nalambigit ug nanggawas karong bag-o ang mga ngalan sa giingong mga kaalyado sab sa Liberal Party ug kang Presidente Noynoy Aquino.
Gani, lakip sa mga unang nanggawas nga mga ngalan sa mga senador mao sila si Senador Bongbong Marcos ug pipila pa ka mga sakop sa oposisyon. Dayon, nanggawas sab ang mga ngalan nga kaalyado sa Liberal Party.
Makaintriga sab kon si kinsa kining si Bigboy, angga sa usa ka suspek nga naapil sa mga dokumento nga naa sa hard disk ni Benhur Luy.
Busa samtang nalipay kita niining pag-abante na sa atong kawsa batok sa pork barrel ug pangurakot, atong klaruhon nga sugod pa lang kini.
Ug angay natong ipadayag karong Hunyo 12, 2014 diha sa Fuente Osmena ang atong sentimento nga kinahanglang silotan ang tanang nalambigit sa Napoles scam.
Kinahanglan sab nga atong iduso ang panginahanglan nga mawala mismo kining pork barrel. Nakahibawo na man kita nga bisan pag nagdesisyon na ang Korte Suprema nga supak sa Batakang Balaod ang pork barrel, gipadayon gihapon kini sa mga magbabalaod sa lain usab nga ngalan.
Lalim bay igo lang nilang gibalhin isip lump sum ngadto sa mga line items sa national budget ug ang mga magbabalaod igo na lang makigsabot sa mga opisyal sa mga ahensya. Padayon gihapon ang sistema. Padayon gihapon ang SOP.
Di malauman ang Kongreso ug Senado nga mowagtang niining ilang tinubdan sa SOP (porsiyento nga mabulsa gikan sap undo alang sa usa ka proyekto) ug kining patronage politics. Gawas sa pork barrel, di sab molihok ang Kongreso alang sa pagpasar sa Freedom of Information (FOI) law.
Mao nga human sa atong rali karong 6/12/14 kun Hunyo 12, 2014 diha sa Fuente Osmena, atong ipadayon ang pakigbisog padulong sa gitakdang People’s Congress dinhi mismo sa Sugbo ug paglusad sa people’s initiative.
Gihatagan man ang katawhan og hinagiban alang sa pagmugnag balaod pinaagi sa people’s initiative, ato kining gamiton aron mapapas na ang pork barrel system.
Kapitolyo
Di lang ang nasudnong kagamhanan ang dunay anomaliya. Karong bag-o, nabunggo na sab ang usa ka anomaliya sa bidding ug pagkontrata og usa ka security agency sa kagamhanan sa lalawigan sa Sugbo.
Tulo lang ka punto:
1. Unang naabot kanako mao ang reklamo sa usa ka sikyo niining Black Pearl Security Agency nga nagreklamo kabahin sa ilang SSS. Nag-due diligence ba ang BAC sa Kapitolyo pagsiguro nga dili hinimo lang ang dokumento sa maong ahensiya?
2. Requirement sa bidding ang lima ka tuig nga kasinatian sa security agency. Ang gipadaog sa bidding nga mao ang Black Pearl Security Agency naporma lang sa miaging 2011. Atty. Orvi Ortega, makamao moihap og tuig ang imong komitiba?
3. Gipadaog ang Black Pearl sa bidding kay ilang gitaho nga mas daghan sila og mga kahimanan labi na sa mga armas. Apan nganong sa ilang pagdalidali og assume sa puwesto bisan pag wa pay kontrata, wa may bisan batuta ang ilang mga sikyo?
***
(Sunda @anol_cebu sa Twitter)