DAGHAN na kaayo ko og nadawat nga reklamo batok niining gihimong pagpangoykoy sa taga Metropolitan Cebu Water District (MCWD) sa atong nga kalsada dinhi sa dakbayan. Ang maong pagpangoykoy nga ila lang biyaan makamugna na hinoon og libaong nga maka-apekto na usab sa dagan sa trapiko o ba kaha moresulta sa disgrasya.

Diha bitaw toy daghang nalimbuwad nga mga motorsiklo diha sa may Salinas Drive diin adunay excavation nga gihimo sa taga MCWD duol diha sa usa ka aeronautic school.  Kay dunay gikoykoy unya wala tabuni. Usa sa mga mireklamo niadto mao si The Freeman columnist/reporter Rene Borromeo kay hapit pod siya madisgrasya.

Karon ania na pod koy nadawat nga susamang reklamo diin didto na usab kini mahitabo sa dakbayan sa Lapu-Lapu. Ania ning suwat-reklamo sa usa ka Rey nga ato lang taguon ang iyang apelyedo.

Maayong adlaw Sir Bob,

“Na-aghat ako sa pagsuwat kanimo niining akong reklamo sa taga MCWD kay dako ang akong pagsalig sa taga media hilabi na gayud bahin aning mga reklamo o yangungu sa katawhan nga sigurado ko nga inyong ipaabot sa hingtungdan ahensya, ma-print or broadcast media man. Kining akong reklamo sa taga MCWD mahitungod anang ilang pagpangguba sa karsada kay lagi naay leaking ang ilang linya sa tubig. Wala koy pagsupak ana kay ilaha manang obligasyon labi na sa ilang mga konsumidor.  Ang akoa lang, Sir Bob, nga inig human sa ilang trabaho o naayo na ang leaking, ila pud untang ibalik kon unsa ang original nga dagway sa karsada. Dili kay pasagdan ra nila.”

Niadtong kadlawon sa Mayo 18, 2014, ang taga MCWD naay gi-repair nga linya sa tubig sa dalan sa Blk 7, Sitio San Miguel, Pusok, Lapu-Lapu City.  Ilang giguba ang sementado nga karsada pero hangtod karon, Sir Bob, wala nila gibalik og semento.  Niabot ang ulan, nahimo na hinoong dakong libaong kay wala man nila gisemento og balik.

Karon kay delikado na sa mga tao labi na gayud sa mga motorista ug nakamugna napud og traffic sa dalan labi na karon tingklase na kay molihay naman ang mga sakyanan sa libaong. Dili diay na SOP sa taga MCWD ang pagsemento og balik sa tarong ug nindot nga karsada nga ila lang sayon-sayonon og guba? Hinaot unta, Sir Bob, nga aksyonan ni sa kadagkuan sa MCWD. 

Daghan kaayong Salamat Sir Bob.

(O, atensiyon taga MCWD. Hinaot nga kining mga lihi­timong reklamo gikan sa nagpakabanang publiko inyo usab nga patalinghugan.)

***

(bobby.nalzaro@yahoo.com)