LANGYAW nga consultant sa usa ka kompaniya sa Toledo City gidunggab sa adik, kinsa nasuya sa langyaw nga nagkaon.

Nahitabo kini pasado alas 7 sa gabii sa Barangay Luray 2 sa mao nga siyudad.

Si P01 Jonathan Cuizon niila sa biktima nga mao si Stephen John Mercer, 32, usa ka Australian national, equipment consultant sa usa ka mining company sa Toledo City.

Matod ni Cuizon nga samtang nagkaon ang biktima, niabot ang suspek nga si Jason Apurado Vernades, 28, taga Poblacion, giingong adik.

Sa way igong hinungdan, gidunggab sa suspek ang biktima sa tangkugo hinungdan sa pagkadangat sa Toledo District Hospital.

Ang biktima nga unang nahiling sa tambalanan, gi­balhin dayon sa pribadong ospital sa dakbayan sa Sugbo.

Si Chief Insp. Michael Anthony Bastes nga nahinabi sa Sun. Star Superbalita niingon nga sa ilang follow-up operation ilang nasikop ang suspek.

Ang pagkaadik sa suspek maoy gitumbok nga motibo sa pagpanunggab kay gigutom kining nagtan-aw sa langyaw nga nagkaon.

Kasong frustrated murder ang giandam sa kapulisan sa Toledo batok sa gikatahapan. (DRT)