SUBRA sa 13,000 ka mangrove propagules ang gipangtanom sa dungan nga mangrove planting sa unom ka coastal sites sa Central Visayas atol sa World Environment Day niadtong Miyerkules.
Ang kalihokan gisalmotan sa kapin 500 ka mga opisyal sa nagkadaiyang local government units, mga empleyado sa Department of Environment and Natural Resources (DENR), mga estudyante ug ubang stakeholders.
Matod ni DENR-Central Visayas Regional Executive Director Isabelo Montejo nga mahinungdanon ang mga bakhaw tungod kay makapugong kini sa dagkong mga bawod.
“..they anchor on the soil and also absorb and dissipate the energy of the waves by 70 percent thus slowing their passage in land and preventing significant damage to the coastal communities,” pagpasabot ni Montejo.
Gawas sa pagpananom og mga bakhaw, gihimo usab ang coastal clean up sa Sitio Labangon, sa Barangay Tulic, lungsod sa Argao; Cabiangon, Pinamungajan; Inoburan, Naga; Dawas Norte, Carmen sa Sugbo; Calayugan Sur sa Loon, probinsya sa Bohol ug Ulo sa Siquijor.
Ang selebrasyon karong tuiga nagdala sa tema nga “Raise your voice, not the sea level.”
Upat ka mga klase sa bakhaw ang gipangtanom nga naglakip sa bungalon o Avicennia marina, Bakhawan Bato o Rhizophora stylosa, Bakhaun Laki o Rhizophora apiculata ug Bakhawan Bae o Rhizophora mucronata.
Sa Barangay Inoburan, Naga City, Cebu, subra sa 5,000 ka mangrove propagules ang gipangtanom sa 200 ka mga partisipante sa mga pribadong kompaniya.
“We are now trying to educate and influence our partners to plant the appropriate mangrove species in a certain place so that our efforts will not go to waste,” dugang ni Montejo. (SCG)