HUMAN napakyas ang kagamhanan sa dakbayan sa Talisay pagkonbinsir ni Budget Officer Edgar Mabunay nga iuli ang premyo sa mga bata nga nikampyon sa Sinulog sa Kabataan, apan giingong gihulman ni Mabunay ang mokabat sa P350,000.

Ning higayona, suwayan sa Talisay City School Division Supt. Woodrow Denuyo makig-estorya ni Mabunay ug hangyuon nga iuli na ang iyang gihu­lamang premyo sa mga bata.

Ang konseho ug si Mayor Johnny de los Reyes lakip na si City Administrator John Yre de los Reyes mipatawag na ni Mabunay apan walay resulta sa ilang pagpatawag hangtod nga migraduwar nalang ang mga bata.

Si Talisay City School Division Supt. Woodrow Denuyo nga nahinabi sa Sun.Star Superbalita niingon iyang komustahon ang gihuwaman nga kuwarta ni Mabunay nga premyo sa mga bata.

Matod ni Denuyo nga maluoy usab siya sa mga bata nga maoy naghago ingon man sa mga magtutudlo apan wala kini nila mapahimusli.

Nagkanayon si Denuyo nga kaniadto wala lang una siya manghilabot tungod kay migawas man sa mga mantalaan nga ang konseho ug ang buhatan sa mayor mao ang nisusi niini.

Apan karon nga nahilom ang isyu gusto niyang masuta kon nabayran naba kay kon wala pa iyang hangyuon si Mabunay nga iuli na samtang kon pilay subra mao nalang ang iuli.

Gipasabot ni Denuyo nga kon nagamit man gayod ni Mabunay tungod sa maong kalihukan, ang DepEd o ba kaha ang city hall aduna may budget andam siyang taplan ug maoy ibayad ngadto sa Talisay City Central School.

Apan nasuta sa Sun.Star Superbalita sa buhatan sa city treasurer nga wala nay utang ang dakbayan ug ila nang nabayran ang tanang gasto sa ilang pagsalmot sa Sinulog.

Gani lakip sa ilang nabayran mao kadtong giingon ni Mabunay nga nagamit ang kuwarta tungod sa ilang repeat performance.

Si Mabunay niasoy sa Sun.Star Superbalita nga andam na lang siyang mopailawom sa imbestigasyon sanglit iya gayod nga nagamit ang kuwarta alang sa katuyoan sa Sinulog sa Kabataan nga wala na lang niya patapli sa city hall. (DRT)